बुधबार दुई ओभरको बीचमा श्रीलंकाका बलर अकिला धनञ्जयले उत्कृष्ट र खराब क्षणको महसुस गरे।
वेस्ट इन्डिजविरुद्धको पहिलो टी-२० मा धनञ्जयले चौथो ओभरमा ह्याट्रिक गरेका थिए।
छैटौं ओभरमा भने उनीविरुद्ध वेस्ट इन्डिजका कप्तान केइरन पोलार्ड आक्रमक रुपमा प्रस्तुत भए। सो ओभरको ६ बलमा ६ छक्का हिर्काएर पोलार्डले कीर्तिमान बनाए।
वेस्ट इन्डिज ६ विकेटले विजयी भएको खेलमा पोलार्ड एकै ओभरमा ६ छक्का हिर्काउने तेस्रा ब्याट्सम्यान बने।
यसअघि एकै ओभरमा ६ छक्का दक्षिण अफ्रिकाका हर्शल गिब्स र भारतका युवराज सिंहले मात्र प्रहार गरेका थिए।
गिब्सले सन् २००७ को एकदिवसीय विश्वकपमा नेदरल्यान्ड्सका डान भान बुगीलाई एकै ओभरमा ६ छक्का हिर्काएका थिए।
मार्च १६, २००७ मा वेस्ट इन्डिजमा भएको खेलमा गिब्स एकै ओभरमा ६ छक्का प्रहार गर्ने पहिलो ब्याट्सम्यान बनेका थिए।
लेगस्पिनर डान भानविरुद्धको ३०औं ओभरमा गिब्बले अद्वितीय ब्याटिङ गरेका थिए। सो खेलमा गिब्सले ४० बलमा ७२ रन जोडेका थिए। खेल दक्षिण अफ्रिकाले २२१ रनको फराकिलो अन्तरले जितेको थियो।
युवराज सिंहले सन् २००७ को टी-२० विश्वकपमा इंग्ल्यान्डविरुद्धको खेलमा एकै ओभरमा ६ छक्का हिर्काएर इतिहास रचेका थिए।
१९ सेप्टेम्बर २००७ मा इंग्लिस बलर स्टुवार्ड बोर्डविरुद्ध युवराजले आकर्षक ब्याटिङ गरेका थिए। उनी एकै ओभरमा ६ छक्का प्रहार गर्ने पहिलो भारतीय बनेका थिए।
यस्तै सिंह टी-२० फर्म्याटमा एक ओभरका सबै बलमा छक्का हिर्काउने पहिलो खेलाडी बनेका थिए।
उनले १२ बलमा अर्धशतक प्रहार गरेका थिए। छिटो अर्धशतकको उक्त कीर्तिमान अझै पनि सिंहको नाममा छ।
सो खेलमा भारत १८ रनले विजयी भएको थियो।
-1746009348.jpg)
