साविक विजेता मछिन्द्र फुटबल क्लबले सहिद स्मारक ए डिभिजन लिगमा सानदार जित हात पारेको छ।
मछिन्द्रले आइतबार दशरथ रंगशालामा भएको खेलमा ब्रिगेड ब्वाइज क्लबलाई ४-० गोलले पराजित गर्यो।
चारै गोल दोस्रो हाफमा गरेको मछिन्द्रका लागि विमल घर्तिमगरले दुई गोल गरे।
उनले खेलको ५६ मिनेटमा पहिलो गोल गरे। ६२ मिनेटमा विमलले व्यक्तिगत तथा टिमका लागि दोस्रो गोल गरेका थिए।
खेलको ८४ मिनेटमा रेजिन सुब्बाले मछिन्द्रका लागि तेस्रो गोल गरेका थिए।
दोस्रो हाफको इन्जुरी टाइमको दोस्रो मिनेटमा अभिषेक रिजालले चौथो गोल गरेपछि मछिन्द्रले फराकिलो अन्तरको जित निकाल्यो।
जितसँगै शीर्ष स्थानको मछिन्द्रले ९ खेलबाट २३ अंक जोडेको छ।
दोस्रो स्थानको मनाङ मर्स्याङ्दी क्लबको १९ अंक छ। ब्रिगेड ब्वाइज भने ६ अंक जोडेर १२औं स्थानमा रहेको छ।