कोरोना संक्रमित बिरामी जाच्ने चिकित्सकले लगाउने एप्रोन (प्रर्सनल प्रोटेक्टिभ इक्युप्मेन्ट) राष्ट्रिय आविस्कार केन्द्रले बनाउने भएको छ।
काठमाडौं टिचिङ अस्पताल र धरानको बिपी अस्पतालले अनुरोध गरेकोले एप्रोन बनाउन लागिएको आविस्कार केन्द्रका अध्यक्ष महाविर पुनले जानकारी दिए।
‘एप्रोन नलगाइ डाक्टरहरुले कोरोना बिरामी जाँच गर्न नमिल्ने रहेछ। एप्रोनको डिजाइन आविष्कार केन्द्रमा बनिसक्यो। करिब ४ सय वटा जति ड्रेस बनाउन सकिने सामान पनि भर्खरै उपलब्ध भयो,’ पुनले सेतोपाटीसगँ भने।
उनका अनुसार भोलिबाट एप्रोन बनाउने काम सुरू हुने छ। एप्रोन बनाउने कच्चा पदार्थ कम भएकाले अन्य सर्जिकल हाउसमा भए आफूलाई दिन समेत उनले आग्रह गरेका छन्।
‘धेरै बनाउन हामीसँग पर्याप्त कच्चा पदार्थ भएन। बजारमा किन्न पनि पाएन। कुनै सर्जिकल हाउसमा छ भने मलाई ९८४१५९२३६१ मा सम्पर्क गर्नुहोला,’ पुनले भने।
