शिक्षा मन्त्रालयले नवीकरण तथा धरौटी नबुझाइ उच्च शिक्षाका वैदेशिक कार्यक्रम सञ्चालन गरिरहेका कलेजहरूको कार्यक्रम रद्द गर्ने प्रक्रिया थालेको छ। मन्त्रालयले विभिन्न देशका विश्वविद्यालयको शैक्षिक कार्यक्रम सञ्चालन गरिरहेका १५ कलेजको कार्यक्रम रद्द गर्न लागेको हो।
यसरी कार्यक्रम रद्दको प्रक्रिया थालिएका अधिकांश कलेजले क्याम्ब्रिज युनिभर्सिटीका ए लेभल पढाइरहेका छन्। मन्त्रालयका अनुसार यी पन्ध्रै वटा कलेजलाई पन्ध्र दिनभित्र नवीकरण गरी शिक्षा मन्त्रालयको दायरामा आउन निर्देशन दिइएको छ।
पन्ध्र दिनको समय दिइएको पनि झन्डै एक साता बित्न लागेको मन्त्रालयले बतायो। ‘पन्ध्र दिनभित्र वैदेशिक कार्यक्रम सञ्चालन गर्ने कलेजहरू दायरामा नआए उनीहरूको शैक्षिक कार्यक्रम रद्द गरिने छ,’ बिहीबार मन्त्रालयमा आयोजित पत्रकार सम्मेलनमा मन्त्री गिरिराजमणि पोखरेलले बिहीबार भने।
उनका अनुसार त्यस्ता कलेजहरूमा क्याम्ब्रिज युनिभर्सिटीको एजे विल्ड इन्स्टिच्यूट अफ एडभान्स स्टडिज, ब्रिजवाटर इन्टरनेसनल कलेज, मल्पी इन्टरनेसनल कलेज, क्यापिटल कलेज एन्ड सिसर्च सेन्टर, एभरेस्ट एजुकेसन फाउन्डेसन, काठमाडौं भ्याली स्कुल, ओरिएन्ट कलेज, पेन्टागन एजुकेसन नेटवर्क, एपेक्स लाइफ स्कुल, साउथ वेस्टर्न स्टेट, कसकस इन्टरनेसनल पोखरा र गन्डकी बोर्डिङ हाइ स्कुल रहेका छन्।
यिनीहरू सबैले ए लेभल पढाउँछन्। सबैले नवीकरण नगरेको, नवीकरणका लागि निवेदन समेत नदिएको र धरौटी नवीकरण नगरेको मन्त्री पोखरेलले बताए।
एसिया प्यासिफिक युनिभर्सिटी अफ टेक्नोलोजी एन्ड एनोभेसन मलेसियाद्वारा सञ्चालित स्काई इन्टरनेसनल कलेज बुटवल पनि मन्त्रालयको कारबाही सूचीमा परेको छ। उसले मास्टर्स अफ साइन्स इन इन्फरमेसन टेक्नोलोजी पढाउँछ। यो कलेजले २०७४ माघ मसान्तभित्र नवीकरण दस्तुरबापतको रकम नबुझाएको मन्त्रालयले जनाएको छ।
बुटवलकै वेस्टर्न मेगा कलेज, धनगढीको वेस्टर्न कलेज पनि नवीकरण नगर्ने कलेजमा परेका छन्। बुटवलको वेस्टर्नले मलेसियाको लिंकन युनिभर्सिटीको शैक्षिक कार्यक्रम चलाउँछ भने धनगढीको वेस्टर्नले अमेरिकाको डेल्टा इन्टरनेसनल कलेजको कार्यक्रम सञ्चालन गर्छ।
वैदेशिक कार्यक्रम सञ्चालन गर्ने कलेजहरूको नियमन प्रभावकारी बनाउन यो कदम चालिएको मन्त्री पोखरेलको दाबी छ।
