प्रहरीले चेकिङको क्रममा सिमेन्टको बोरा भित्रबाट लागुऔषध बरामद गरेको छ।
महानगरीय प्रहरी प्रभाग नागढुंगाका प्रहरी नायब निरीक्षक सराेज सिलवालको कमान्डमा खटिएको प्रहरी टाेलीले चेकिङको क्रममा सिमेन्टको बोराभित्र लुकाई राखेको अवैध लागुऔषध बरामद गरेको हो।
राजविराजबाट काठमाडौंतर्फ आउँदै गरेको ना ८ ख ६४९७ नम्बरको यात्रुवाहक बसमा चेक गर्दा लागुऔषधसहित दुई जनालाई नियन्त्रणमा लिइएको काठमाडौं प्रहरी परिसरका प्रवक्ता एसपी साेमेन्द्र सिंह राठौरले बताए।
राठौरका अनुसार पक्राउ पर्नेमा सिराहा लहान वडा नम्बर २३ बस्ने वर्ष १६ का इन्द्रजीत सहनी, सिराहा लहान वडा नम्बर १३ बस्ने वर्ष २४ का अम्मर यादव रहेका छन्।
उनीहरूको साथबाट सिमेन्ट बोरामा लुकाइराखेको नाइट्राेजेपाम (नाइट्राभेट ) १२ सय ट्याबलेट, डाइजेपाम १३४ एम्पुल, फेनरागन १३४ एम्पुल,नुर्फिन १३० एम्पुल, बरामद गरिएको महानगरीय प्रहरी वृत्तले जनाएको छ।
पक्राउ परेका दुई जनालाई थप अनुसन्धानका लागि महानगरीय प्रहरीले वृत्त पठाइसकेको नागढुङ्गा प्रहरीले जनाएको छ।
