१३६ किलो तौल भएकी मुटुरोगी महिलाको दुरबिन प्रविधिबाट पाठेघर र पित्तथैलीको जटिल शल्यक्रिया गरिएको छ।
थापाथलीस्थित नर्भिक इन्टरनेशनल हस्पिटलमा वरिष्ठ स्त्री रोग बिशेषज्ञ एवं ल्याप्रोस्कोपिक सर्जन डा. नुतन शर्मा, बरिष्ठ सर्जन डा. सञ्जय पौडेल, बरिष्ठ मुटुरोग बिशेषज्ञ डा.जेपी जैसवाल र डा. सुरेश लामिछानेसहितको टिमले करिब साढे २ घण्टा लगाएर ललितपुर पाटनकी ३८ वर्षिय रत्ना महर्जनको जटिल शल्यक्रिया गरेको हो।
सामान्यत, १ सय ३६ किलो तौल भएका बिरामीको दुरबिन प्रविधिबाट पाठेघर र पित्त थैलीको एकै पटक शल्यक्रिया गर्नु निकै कठिन भए पनि अस्पतालमा उपलव्ध अन्तर्राष्ट्रिय स्तरको सुविधाका कारण सहजै शल्यक्रिया सकिएको डा. शर्माले जानकारी दिइन्।
‘पाठेघरमा अधिक मासु पलाएको र पित्त थैलीको समस्याका कारण बिरामी सामान्य हिँडडुल गर्न नसक्ने अवस्थामामा हुनुहुन्थ्यो’, ल्याप्रोस्कोपिक सर्जन डा. शर्माले भनिन्, ‘शल्यक्रियाको दुई दिनमा उहाँ राम्रोसँग हिड्ने अवस्थामा हुनुहुन्छ, शल्यक्रियाको तीन दिनमै उहाँलाई हामी डिस्चार्ज गर्दैछौं। दुरबिनबाट शल्यक्रिया गरेका कारण अवको एक हप्तापछि उहाँले नियमित काम गर्न सक्नुहुन्छ।’
शरीरमा बढी तौल भएका कारण मुटुको समस्या हुँदा समेत सहज ढंगले शल्यक्रिया सम्पन्न भएको भन्दै महर्जनले खुशी व्यक्त गरिन्।
बढी तौल भएकाको पेट चिरेर शल्यक्रिया गर्दा रगत धेरै बग्ने, घाउँ निको हुन समय लाग्ने र घाउ पाक्ने जस्ता समस्या आउने भएकाले बिरामीलाई अधिक आराम र सुविधा दिन दुरबिन प्रविधि निकै लाभदायक हुने चिकित्कको भनाई छ ।
आधुनिक प्रविधि र सुविधा भए उच्च जोखिममा रहेका बढी तौल भएका बिरामीको शल्यक्रिया पनि सहज रुपमा गर्न सकिने डा. शर्माले बताइन्।
टेष्ट ट्यूव बेवी विशेषज्ञ समेत रहेकी डा.शर्माले गत असारमा नर्भिक अस्पतालमै १ सय ६८ किलो तौल भएकी महिलाको शल्यक्रियामार्फत सफल प्रशूति गराएकी थिइन्।
