आधुनिक स्वादमा परम्परागत नेपाली रेसिपी पुनर्जीवित गर्ने उद्देश्यले नयाँ नेपाली डेसर्ट ब्राण्ड 'माक्कुसे' बजारमा आएको छ। नेवारी भाषामा 'माक्कुसे'को वर्णन नै गर्न नसकिने अत्यन्तै मिठो भन्ने हुन्छ।
माक्कुसे ब्राण्डबाट हाल परम्परागत पुष्टकारी, गुलाबजल र पिस्ता सहितको गुदपाक, मोका (कफि मिश्रित) गुदपाक, चकलेट र गुदपाकबाट बनेको कुकिज, ओटमिल र पम्किन सिडबाट बनेको कुकिज उपलब्ध छन्।
माक्कुसेका उत्पादनहरू परम्परागत नेपाली डेसर्टबाट प्रेरित छन्।
उत्पादनहरू दूधको खुवा प्रयोग गरी बनाइएको छ। पहिलेको स्वाद र नयाँ तरिकाको बनावट रहेका यी उत्पादनहरूले पुराना र नयाँ स्वादलाई सन्तुलन गर्ने बताइएको छ।
‘गुदपाक, पुष्टकारी मिठो स्वादका लागि मात्रै होइन, पोषणका लागि पनि उत्तिकै महत्त्व बोकेको छ। हामीले यसको ठेट स्वादलाई कायम गरी आधुनिक तरिकाबाट प्रस्तुत गर्न खोजेका छौं,' माक्कुसेका सिइओ तथा सह–संस्थापक अनुष्का श्रेष्ठ भन्छिन् 'हाम्रो उत्पादनहरू विगतको दायराबाट नवीन र उत्साहजनक भविष्यतर्फ लम्किएको छ।'
गुदपाक जस्तो ठेट नेपाली डेसर्ट पछिल्लो समय लोप हुँदै गैरहेको अवस्थामा कच्चा पदार्थको गुणस्तर र स्वास्थ्य संवेदनशीलतालाई मध्यनजर गर्दै गुणस्तरीय उत्पादनमा जोड दिएको अनुष्काको भनाइ छ।
काभ्रेबाट दैनिक ताजा खुवा ल्याएर माक्कुसेको उत्पादन तयार गरिने बताइएको छ।
मिस वर्ल्ड नेपाल २०१९ को विजेता समेत रहेकी अनुष्का मिस वर्ल्डमा सहभागी भएर फर्केपछि विश्वमाझ नेपाललाई चिनाउने भोक आफूमा जागेको र सोही चाहनालाई पछ्याउँदै माक्कुसेको स्थापना गरेको बताउँछिन्।
हाल माक्कुसेलाई अनुष्काले नै नेतृत्व गरिरहेकी छन्।
अस्ट्रेलियामा उच्च शिक्षा अध्ययनपछि नेपाल फर्केर व्यवसायमा लागेकी अनुष्का विदेशमा आर्जन गरेको सीप र ज्ञान स्वदेशमा सदुपयोग गर्नुपर्नेमा विश्वास राखेको बताउँछिन्।
परम्परागत डेसर्टलाई बजारमा ल्याएर व्यवसायमा जम्न सजिलो थिएन झन् माक्कुसे सुरू गर्नै लाग्दा कोभिड १९ का कारण समय जटिल पनि बन्यो।
यो चुनौतीलाई सामना गर्दै विभिन्न क्षेत्रमा सफल युवा तथा महिला उद्यमीहरूको समूहले पोषण तथा सरसफाइ ध्यानमा राखेर गुणस्तरीय उत्पादन गर्न सफल भएको छ।
‘जब हामी कुनै खास देशको मिठाइहरू सोच्दछौं त अनकौं तस्वीर दिमागमा आउँदछ। नेपाली मिठाइका बारेमा सोच्दा तपाईंको दिमागमा कस्तो चित्र आउँछ?' अनुष्का भन्छिन् 'हामी विश्वास गर्दछौं कि माक्कुसे यसको जवाफ हुन सक्छ।’
माक्कुसे, नेपाली डेर्जट ब्राण्ड नेपालमा मात्र नभई विश्वमै नेपालको मिठाइको अद्वितीय पहिचान बनाउन सफल हुने बिश्वास माक्कुसे टिमको रहेको छ।
माक्कुसेको सामाजिक संजाल र लोकप्रिय नेपाली ईकमर्स ग्यापु मार्केटप्लेसको मोबाइल एप तथा वेबसाईट (gyapu.com) मा अर्डर गरी माक्कुसे नेपाल भर घरैमा डेलिभरी मगाउन सकिन्छ।
ग्यापुमार्फत नै विदेशमा रहेका व्यक्तिले सोही देशको डेबिट/क्रेडिट कार्ड प्रयोग गरेर नेपालमा रहेका आफन्तलाई माक्कुसेका उत्पादन उपहार पठाउने व्यवस्था समेत मिलाइएको छ।
