उपप्रधान तथा अर्थमन्त्री विष्णु पौडेलले लुम्बिनी प्रादेशिक अस्पतालको निर्माणाधीन भवनको निरीक्षण गरेका छन्।
एमालेका उपाध्यक्ष समेत रहेका पौडेलले आइतबार गृह नगर बुटवल आएको मौकापारि निर्माणाधीन अस्पतालको निरीक्षण गरेका हुन्।
सो क्रममा उनले निर्माणाधीन भवनको भौतिक प्रगति र कामको गुणस्तरबारे जानकारी लिएका थिए।
अनुगमनको क्रममा अस्पताल भवन निर्माणको लागि लुम्बिनी प्रदेश सरकारले आवश्यक बजेट विनियोजन गर्दै आएको उल्लेख गर्दै गुणस्तरमा कुनै सम्झौता नगर्न र निर्धारित समयमै भवन निर्माणको काम पूरा गर्न निर्माणको जिम्मेवारी लिई रहेको प्रदेश पूर्वाधार विकास प्राधिकरणलाई निर्देशन दिए।
अर्थमन्त्री पौडेलले निर्माण स्थलको निरीक्षणसँगै हालसम्म भएका प्रगतिबारे प्राधिकरणका प्रमुख कार्यकारी अधिकृत इन्जिनियर छवि पोखरेलसँग जानकारी लिएका थिए।
प्रमुख कार्यकारी अधिकृत पोखरेलले अस्पतालको भौतिक प्रगतिबारे जानकारी दिँदै निर्धारित समयभन्दा १ वर्षअघि नै भवन निर्माण सम्पन्न गर्ने बताए।
भवन निर्माणको काम सुरू भएको १० महिनाको अवधिमा २६ प्रतिशत भौतिक प्रगति भएको छ।
भवन निर्माणको लागि आर्थिक सङ्कटको सामना गर्न नपरे निर्धारित समयभन्दा एक वर्ष पहिले नै निर्माणको काम पूरा हुने पोखरेलले दाबी गरे।
‘अहिलेसम्म जुन रफ्तारमा निर्माणको काम भइरहेको छ, यसलाई हेर्ने हो भने कुनै आर्थिक सङ्कट वा ठूलो विपत्ति आइपरेन भने ५ वर्षमा सक्नुपर्ने काम हामीले ४ वर्षमै सम्पन्न गर्छौं,’ पोखरेलले भने।
पोखरेलले चार वर्ष मै भवन निर्माणको काम पूरा गर्ने बताएपछि अर्थमन्त्री पौडेलले प्रतिबद्धता अनुसार काम पूरा गरेर देखाउन आग्रह गरेका थिए।
‘एक वर्ष अगाडि नै अस्पतालको भवन निर्माणको काम पूरा हुन्छ नि! यता फर्किएर भन्नुस्,’ अर्थमन्त्री पौडेलले भने।
अर्थमन्त्री पौडेल लुम्बिनी प्रदेशका पूर्व मुख्यमन्त्री लीला गिरी, पूर्व स्वास्थ्य मन्त्री तथा प्रदेशसभा सदस्य भोजप्रसाद श्रेष्ठ, नेकपा एमाले पोलिट ब्युरो सदस्य दधिराम न्यौपाने, एमाले लुम्बिनी प्रदेश सदस्य गोपाल राना लगायतको साथमा अस्पतालको निरीक्षणका लागि पुगेका थिए।
मुलुकमै सबभन्दा ठूल १२ तलाको अत्याधुनिक सुविधासहितको अस्पताल बनाउने भन्दै २०८० साल पुस २६ गते प्रदेश पूर्वाधार विकास प्राधिकरणले भवन निर्माणको लागि ठेक्का सम्झौता गरेको थियो।
सुविधा सम्पन्न दुई वटा भवन, उपकरण र आन्तरिक व्यवस्थापनसहित ८ अर्ब ९९ करोड ७५ लाख ६४ हजार लागत अनुमान गरिएकोमा भारतीय निर्माण कम्पनी क्याप साइट आशिष रेलिग्रेट भेन्चर र नेपाली कम्पनी आशिष रेलिगेसनसँग ६ अर्ब १८ करोड रुपैयाँमा ठेक्का सम्झौता गरिएको थियो।
ठेक्का सम्झौता अनुसार ५ वर्ष अर्थात् २०८५ पुस २५ गतेभित्र निर्माण सम्पन्न गर्नुपर्ने सर्त रहे पनि ठेक्का सम्झौता भएको आठ महिनापछि मात्रै २०८१ भदौ १५ गते शिलान्यास गरी भवन निर्माणको काम अगाडि बढाइएको थियो।
भवन निर्माणको काम पूरा भएपछि लुम्बिनी प्रादेशिक अस्पताल मुलुकमै सबैभन्दा ठूलो र अत्याधुनिक सुविधासहितको सरकारी अस्पताल बन्ने छ।
११५ वर्ष पुरानो यो अस्पतालमा हाल ५३० भन्दा बढी बेडबाट बिरामीहरूलाई उपचार सेवा दिँदै आएको छ।
अहिले निर्माणाधीन १२ तलाको भवनको काम पूरा भएपछि १२ सय बेड पुग्ने छन्।
-1746009348.jpg)
