३०१ केन्द्रीय सदस्यको नाम पढेर सुनाए ओलीले (अडिओ)

केही असन्तुष्टहरू हुटिङ गर्दै मञ्चमा उक्लिन खोज्दा ओलीले भने- यहाँ नआउनुस्

सन्जिब बगाले

चितवन, मंसिर १३

नेकपा एमालेका अध्यक्ष केपी शर्मा ओलीले दसौं महाधिवेशनको बन्दसत्रमा ३०१ जना केन्द्रीय सदस्यको नाम सर्वसम्मतिका लागि पढेर सुनाएका छन्।

उनले बन्दसत्रको हलभित्र महाधिवेशन प्रतिनिधिहरूका अगाडि सुरूमा ३०० जनाको नाम पढेका थिए। तीमध्ये १०१ जना महिला थिए। सबै नाम पढेपछि ओलीले भने, 'मेरो नाम मात्र पढ्न बाँकी छ। म के गरूँ?'

उनले यसो भनेपछि हलले जोडसँग ताली बजायो। त्यसपछि ओलीले आफ्नो नाम लिए।

उनले सबै नाम पूरा गरेपछि हलले ताली बजाएर स्वागत गरेको थियो। नाम नपर्ने केहीले भने हुटिङ पनि गरेका थिए। केही असन्तुष्टहरू हुटिङ गर्दै मञ्चमा उक्लिन खोजेका थिए। ओलीले तिनलाई 'मञ्चमा नआउनुस्' भन्दै हप्काए।

ओलीले प्रस्तुत गरेको सूचीमा कसैलाई असहमति भए निर्वाचन हुने भनी ओलीले घोषणा गरिसकेका छन्।

निर्वाचन आयोगका प्रमुख विजय सुब्बाले ३०१ जनाको सूचीमा परेकाहरूले प्रक्रियाअनुरूप सोमबार मनोनयनपत्र दर्ता गराउनुपर्नेछ। यो नामावली समझदारीका लागि घोषणा गरिएको र उनीहरूले विधिवत् रूपमा केन्द्रीय सदस्य चुनिन प्रक्रियामा जानैपर्ने सुब्बाले सेतोपाटीलाई जानकारी दिए।

अध्यक्ष ओलीले १ सय १ जना महिलासहित ३०१ केन्द्रीय सदस्यको नाम प्रस्ताव गरेका थिए। उनले क्रमश: खुला, महिला, प्रदेश हुँदै, दलित, जनजाति, मजदुर लगायत विभिन्न वर्गबाट केन्द्रीय सदस्य बन्नेहरूको नाम हलमा पढेर सुनाएका थिए।

'अध्यक्षज्यूले समझदारीका लागि मात्र नाम दिनुभएको हो। यी सबैले प्रक्रियामा जानैपर्छ। भोलि सोमबार निर्वाचन तालिकाअनुसार उहाँहरूको मनोनयनपत्र दर्ता हुन्छ,' सुब्बाले भने, 'खुला वा विभिन्न वर्गमा तोकिएभन्दा बढी सदस्यले मनोनयनपत्र दाखिला गरे निर्वाचन हुनेछ।'

एमालेको बन्दसत्रको हलले ओलीलाई सर्वसम्मत रूपमा केन्द्रीय समिति गठनका लागि प्रस्ताव पेस गर्ने जिम्मेवारी दिएको थियो।

यस्तो छ ओलीले पढेको नामावली, सुन्नुहोस् अडिओमा: