सर्वोच्च अदालतमा गोलाप्रथा लागु गर्ने नियमावली राजपत्रमा प्रकाशित भएको छ।
गएको साता सर्वोच्च अदालतको फुलकोर्ट नियमावली संसोधन गरी कानुन मन्त्रालयमा नियमावली पठाएको थियो।
उक्त नियमावली सोमबार राजपत्रमा प्रकाशित भएको हो। राजपत्रमा प्रकाशित भएको उक्त नियमावली अब फुलकोर्टको निर्णयबाट लागु हुने सर्वोच्चका एक न्यायाधीशले बताए। गोलाप्रथा लागु गर्न अब सर्वोच्च प्रशासन र प्राविधिक पक्षले पनि तयारी गर्नुपर्ने उनको भनाइ छ।
'नियमावली राजपत्रमा आयो। अब गोलाप्रथामा जान कानुनी हिसाबले योग्य भएको हो। गोलाप्रथा कसरी लागु गर्ने कहिलेबाट लागु गर्ने निर्णय फेरी फूर्लकोर्ट बसेर गर्छ,' उनले भने, 'प्रशासनिक प्रकृया र प्राविधिक प्रकृया मिलाएपछि बल्ल गोलाप्रथाबाट पेशी तोक्न सकिन्छ। त्यसको तयारी अहिले भइसकेको भए छिटो लागु हुन्छ नभए केही समय लाग्छ।'
यो नियमावली लागु भएसँगै सर्वोच्च अदालतको पेशी तोक्ने प्रधानन्यायाधीशको अधिकार कटौती हुनेछ।
सर्वोच्च अदालतको पेशी व्यवस्थापनमात्र होइन त्यहाँ आएका समस्या पनि आजसम्म प्रधानन्यायाधीशले गर्दै आएका थिए। अब भने पेशीमा आएका समस्याहरूको समाधान गर्ने एउटा निर्देशन समिति बन्ने नियमावलीमा उल्लेख छ। प्रधानन्यायाधीशको अध्यक्षतामा बनेको उक्त समितिले पनि समाधान गर्ने नसके उसले फूर्लकोर्टमा पेश गर्ने छ।
न्यायाधीश हरिकृष्ण कार्की नेतृत्वमा गठित समितिले न्यायालयमा पेशी व्यवस्थापनमा हुने विसंगति रोक्न गोलाप्रथाबाट पेशी तोक्नुपर्ने सुझाव दिएको थियो।
प्रधानन्यायाधीश चोलेन्द्र शमसेर राणाले कार्यान्वयन गर्ने जनाए पनि गोलाबाट पेशी तोक्ने व्यवस्था लागु गर्न आनाकानी गर्दै आएका थिए। अहिले उनीविरूद्ध आन्दोलनरत न्यायाधीश र नेपाल बार एशोसिएसनको एउटा माग गोलाप्रथाबाट पेशी तोक्ने प्रकृया लागु गर्नुपनि हो। नेपालबारले केही वर्षदेखि गोलाप्रथा लागु गर्ने माग उठाउँदै आएको थियो।
-1746009348.jpg)
