एउटा समूहले चुनाव बहिस्कार गरेपछि रूपन्देही निर्वाचन क्षेत्र नम्बर ३ को नेपाली कांग्रेसको मतदान प्रक्रिया स्थगित भएको छ।
सोमबार दिउँसो निर्वाचन हुने भनिए पनि रामचन्द्र पौडेल समूहले बहिस्कार गरेपछि केन्द्रीय निर्वाचन समितिको आदेश अनुसार मतदान प्रक्रिया स्थगित गरिएको निर्वाचन समितिले जनाएको छ।
ढिलो गरी सुरू भएको मतदानमा असुरक्षाको कारण देखाउँदै क्षेत्रीय सभापति पदका पौडेल समूहका उम्मेदवार मात्रिकाप्रसाद यादव प्यानलले निर्वाचन बहिस्कार गरेको हो।
चर्को दबाबबीच मतदान सुरू भए पनि यादव समूहले मतदान कार्य बहिष्कार गरी निर्वाचनस्थलबाट बाहिरिएपछि अर्को सूचना नभएसम्मको लागि निर्वाचन प्रक्रिया स्थगित गरिएको मतदान अधिकृत जीवनारायण अधिकारीले बताए।
मतदान बहिस्कार गरी बाहिरिएको यादव समूहले देउवा समूहले शक्तिको आडमा ‘गुण्डागर्दी’ शैली अपनाउँदै जबरजस्ती मतदान गराएको आरोप लगाएको छ।
सभापति पदका उम्मेदवार यादवले मतदान अधिकृतले पनि सत्ताकै दबाबमा जानी-जानी ढिलो मतदान सुरू गरेकाले आफूहरूले बहिस्कार गरेको दाबी गरे।
मतपत्र तयार गर्ने बहानामा निर्वाचन समितिले ढिलो मतदान सुरू गरेको र राति धाँदली हुन सक्ने भएकोले मंगलबारको लागि मतदान सार्न आग्रह गरिएको उनले बताए।
पौडेल समूहले घटनाको जानकारी केन्द्रमा गराएपछि केन्द्रीय निर्वाचन समितिले मतदान स्थगित गरेको थियो।
क्षेत्रीय सभापति पदका अर्का उम्मेदवार सुशील गुरुङ समूहले भने निर्वाचन हार्ने डरले यादव समूह चुनावबाट भागेको आरोप लगाएको छ।
दुई समूहबीच निर्वाचन गर्ने विषयमा सहमति नजुटेपछि साँझ ४ बजे मात्र सुरू भएको मतदानमा ५० जनाले मतदान गरिसकेको मतदान अधिकृत अधिकारीले बताए।
उनले मनोनयनदेखि नै यादव पक्षले असहयोग गरेको दाबी गरे। नेपाली कांग्रेसका जिल्ला सचिव रामकृष्ण खाणले पार्टीको आन्तरिक निर्वाचन भएको र सहकार्यमै निर्वाचन सम्पन्न गरिने भएकोले यसबाट कोही भाग्नु नपर्ने बताए।
-1746009348.jpg)
