नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले पछिल्लो पटक अमेरिकी सहायक विदेश मन्त्रीको डेलिगेसनपछि एमसिसीबारे छलफल अझ बढी गम्भीर ढंगले चलेको बताएका छन्।
बुधबार बिहान धनगढी विमानस्थलमा पत्रकारसँग कुरा गर्दै उनले एमसिसी यति विवादमा नहुनुपर्ने बताए।
‘ओरिजिनल सम्झौता हुँदा देउवा प्रधानमन्त्री र माओवादी पनि सरकारमा थियो, पछिल्लो सरकारले पार्लियामेन्टबाट परित गर्नुपर्ने कुरा थपिदिएपछि विवाद र जनतामा चिन्ता बढेको हो,’ उनले भने।
अहिले पहिलो सम्झौतातिरै फर्कन सकिने विषयमा छलफल भइरहेको उनले जानकारी दिए।
अर्को जनताका मनमा उठेका कुराको सम्बोधन गर्ने तरिकाको खोजी गरिने उनले बताए।
‘अमेरीकाले दिने ऋण सहयोग नलिने भन्ने त नेपालको नीति नै हैन, ७५ वर्षदेखि हाम्रो कूटनीतिक सम्बन्ध छ। विभिन्न सहयोग भएका छन्, हामीले स्वीकारेका छौं, नेपाली जननताले उपभोग गरेकै छन्,’ उनले भने।
त्यसैले सबै प्रमुख राजनीतिक दलका बीचमा समझदारी बन्ने वातारण बनाउने कुरा, वरिष्ठ सम्पादकहरूसँग छलफल गरी धारणा र सुझाव लिएर सहमति बनाउने कोसिस गरिने उनले बताए।
नागरिक आन्दोलनमा लागेकाहरूको रायसल्लाह लिएर राष्ट्रिय सहमति बनाएर अगाडि जानेतिर प्रयास हुने प्रचण्डको भनाइ छ।
‘प्रधानमन्त्रीलाई एकपटक राष्ट्रिय सहमतिका लागि एकचोटि पहल गरौं त्यसपछि कस्तो वातावरण हुन्छ त्यही अनुसार कदम चाल्छौंं भनेको छु, त्यसमा सहमति पनि भएको छ,’ उनले भने।
महाधिवेशन र सम्मेलन सकिएपछि सर्वदलीय बैठकले ढिलो भए पनि छिट्टै यसबारे छलफल हुने उनले बताए।
‘तपाईंले सबै थाहा पाउनुहुन्छ, लुकिछिपी केही पनि हुँदैन,’ उनले भने।
-1746009348.jpg)
