सर्वोच्च अदालतका न्यायाधीशहरूले गोलाप्रथा लागु गर्ने मिति तय गर्न फुलकोर्ट बस्नुपर्ने निधो गरेका छन्।
बुधबार सर्वोच्च अदालतका न्यायाधीशहरूले गोलाप्रथा प्रक्रिया लागु गर्न फुलकोर्ट डाक्न मुख्य रजिष्ट्रारलाई सन्देश पठाएको एक न्यायाधीशले बताए।
अघिल्लो हप्ता फुलकोर्टले नै प्रधानन्यायाधीशले पेसी तोक्ने अधिकार कटौती गरी गोलाप्रथा लागु गर्ने गरी सर्वोच्च अदालत नियमावली पास गरेको थियो।
नियमावलीमा गोलाप्रथा लागु गर्ने मिति पनि फुलकोर्टले नै तय गर्नुपर्ने उल्लेख थियो।
त्यसकै लागि मिति तय गर्न फुलकोर्ट डाक्ने सहमति गरी न्यायाधीशहरूले मुख्य रजिष्ट्रारलाई खबर पठाएका हुन्।
'हामीले गोलाप्रथाबाट इजलास गठन र पेसी तोक्ने प्रक्रिया लागु गर्न फुलकोर्ट बस्ने निर्णय गरेका छौं,' उनले भने, 'भोलि नै फुलकोर्ट बैठक बस्ने व्यवस्था गर्न मुख्य रजिष्ट्रारलाई खबर पठाएका छौं। उहाँले प्रधानन्यायाधीशसँग सल्लाह गर्नुहोला। बैठक बसे भोलि मिति तय हुन्छ।'
अर्का एक न्यायाधीशका अनुसार भोलि फुलकोर्ट बस्यो भने अर्को बुधबारदेखि गोलाप्रकृयाबाट इजलास र पेसी तोक्ने अनि इजलास फर्किने निष्कर्ष उनीहरूको छलफलले निकालेको छ।
'गोलाप्रक्रिया लागु गर्ने मिति पनि राजपत्रमा प्रकाशित गर्नुपर्ने छ त्यसैले अर्को बुधबारदेखि गोला प्रक्रियामा जाने तय भएको छ। तर भोलि के हुन्छ हेरौं,' उनले भने।
गोलाप्रथाले पेसी तोकेपछि इजलास फर्किए पनि प्रधानन्यायाधीश चोलेन्द्र शमसेर राणासँग आफूहरूले इजलास सेयर नगर्ने तय गरेको उनले बताए।
गोलाप्रथाबाट पेसी तोकेपछि प्रधानन्यायाधीशको पेसी तोक्ने अधिकार खोसिन्छ।
आजसम्म प्रधानन्यायाधीशले तोकेका इजलास नबस्ने निर्णय गरेका न्यायाधीशलाई पनि इजलास फर्किने बाटो खुल्छ।
सत्तासँग सौदाबाजी गरेको भन्दै सर्वोच्चका सबै न्यायाधीशले प्रधानन्यायाधीशसँग राजीनामा माग गरेका छन्। राजीनामा मागेपछि उनले तोकेका इजलास र उनीसँगको इजलास बहिष्कार गर्ने निर्णय गरेका थिए।
एक महिना अघिदेखि उनीहरूले प्रधानन्यायाधीशको राजीनामा माग गर्दै इजलास बहिष्कार गर्दै आएका छन्।
-1746009348.jpg)
