नेकपा (एमाले) का ७७ वटा जिल्ला कमिटीमध्ये धनुषामा मात्रै अधिवेशन गर्न बाँकी थियो।
केन्द्रीय कार्यालयले तोकेको समयसीमा निकै अघि सकिइसकेको भए पनि धनुषाको अधिवेशनको मिति तोकिएको थिएन।
केन्द्रीय निर्वाचनको ताकेतापछि वैशाख २० गतेदेखि २३ गतेसम्म आठौं जिल्ला अधिवेशन गर्ने गरी मिति तोकिएको थियो।
गत आइतबार पार्टीका वरिष्ठ उपाध्यक्ष ईश्वर पोखरेलले अधिवेशन उद्घाटन गरेका थिए।
सोमबारबाट निर्वाचनको प्रक्रिया अघि बढाइएको थियो। सोमबार दिनभर मनोनयन दर्ताको काम सकिएपछि मंगलबार बिहान उम्मेदवारको अन्तिम सूची टाँस्ने बेलामा विवाद भयो।
एमालेका एक प्रतिनिधिले दिएको जानकारीअनुसार सोमबार रातभरि निवर्तमान जिल्ला अध्यक्ष राजकिशोर यादवसहितका नेता बसेर सनाखत र उम्मेदवारी फिर्ताको काम गरेका थिए। मंगलबार बिहानी पखसम्मै त्यो काम चलेको थियो।
दाबी, विरोध र उम्मेदवारी फिर्ताको काम सकिएपछि उम्मेदवारको अन्तिम नामावली टाँस्नेबेला निवर्तमान जिल्ला अध्यक्षको समूहले उपसचिवमा उम्मेदवारी दिएको सुरेश ठाकुरको नाम फिर्ता नै भएको छैन भन्दै विवाद गर्न थाले।
विवाद बढ्दै गएपछि केन्द्रीय निर्वाचन आयोगका प्रमुख विजय सुब्बाले निवर्तमान जिल्ला अध्यक्ष यादवलाई ‘अघि सनाखत गर्ने बेलामा त तपाईं नै हुनुहुन्थ्यो त! अहिले उम्मेदवारी फिर्ता भएकै छैन भन्न मिल्छ?’ भन्दै प्रश्न गरेको ती प्रतिनिधिले बताए।
त्यसपछि निवर्तमान जिल्ला अध्यक्षनिकट केही व्यक्तिहरू सुब्बालाई नै गालीगलोज गर्दै तोडफोडमा उत्रन थालेको ती प्रतिनिधिको भनाइ छ।
दुई पक्षबीच झडप सत्यनारायण महासेठ र रामउद्गार दाससहित पाँच जना घाइते भएका थिए।
एमाले धनुषामा सचिव महासेठ, पोलिटब्युरो सदस्य जुली महतो, केन्द्रीय सदस्य हरिनारायण महतो एकातिर छन्। एमाले मधेस प्रदेश संसदीय दलका नेता यादव, केन्द्रीय सदस्य उमाशंकर अरगरिया, मधेस प्रदेशका सभामुख रामचन्द्र मण्डल, निवर्तमान अध्यक्ष राजकिशोर यादव, सञ्जीव झालगायत नेता एकातिर छन्।
दुवै पक्षले समूह बनाएर उम्मेदवार खडा गरेका छन्। महासेठ पक्षले अध्यक्षमा भोला यादव, उपाध्यक्षमा जयप्रकाश सुनरैत, सचिवमा दीपनारायण ठाकुर, उपसचिव (खुला) मा सविनविक्रम थापा र महिलातर्फ किरण कापरलाई अघि सारेको छ।
इतर समूहले अध्यक्षमा लक्ष्मीनारायण यादव, उपाध्यक्षमा तेजनारायण यादव, सचिवमा धिरेन्द्रकुमार मण्डल, खुला उपसचिवमा हरिकिशोर यादव र महिला उपसचिवमा रूकाकुमारी मिश्र अघि सारेका छन्।
चुनावी प्रक्रिया अघि बढाइरहँदा निर्वाचन समितिले तयार पारेको मतपत्र, मतपेटिका, ल्यापटप, कम्प्युटरलगायत सामग्री तोडफोड गर्ने र प्रतिनिधिलाई हात हतियारसहित आक्रमण गर्न थालेपछि अधिवेशन स्थगित गरिएको केन्द्रीय सचिव महासेठले बताए।
‘उम्मेदवारी मनोनयन, दाबी–विरोध आदि टुंग्याएर मतदान सुरू गर्ने बेलामा विवाद झिकेर तोडफोड गर्न थालियो। प्रतिनिधि समेतलाई कुटपिट भएपछि उहाँहरूलाई घर पठाइएको छ। अब हामी मतदानको अर्को मिति तोक्छौं,’ महासेठले भने।
मधेस प्रदेश इन्चार्ज लिलानाथ श्रेष्ठले पनि केन्द्रीय निर्वाचन आयोगले अध्यक्ष मण्डलको बैठक राखेर मतदानको अर्को मिति तय गर्ने बताए। तत्कालै मतदान हुने अवस्था भने नरहेको उनले बताए।
तोडफोडमा किन उत्रिए रघुवीर महासेठइतर समूह?
एमाले धनुषाका एक नेताले दिएको जानकारीअनसार त्यहाँ केन्द्रीय सचिव रघुवीर महासेठ पक्ष बलियो छ। कूल ६३० प्रतिनिधिमध्ये ४०० भन्दा बढी प्रतिनिधि महासेठ पक्षका छन्।
तथापि इतर समूहले हार्ने डरले मात्रै भाँडभैलो नगरेको उनको दाबी छ।
उनका अनुसार एमाले धनुषाको अधिवेशनमा पार्टी महासचिव शंकर पोखरेललाई नै प्रमुख अतिथिका रूपमा निम्त्याइएको थियो। उनी गएनन्।
लामो समय मधेस, त्यो पनि जनकपुरमै बसेर पार्टी काम गरेका हिसाबले वरिष्ठ उपाध्यक्ष ईश्वर पोखरेललाई प्रमुख अतिथि बनाइएको थियो।
पोखरेलले मन्तव्य दिने क्रममा मधेसका जनप्रतिनिधि, मन्त्रीसमेतले योजनाहरू बिक्री गरेको बताएका थिए।
पार्टीका मन्त्री, जनप्रतिनिधि विरोधीहरूसँग साँठगाँठ गर्दै बदनाम भइरहेको र यस्तो गतिविधि बढ्दै जाँदा पार्टी र देशको भविष्य बर्बाद हुने उनले बताएका थिए।
‘हाम्रा सबै जनप्रतिनिधि, अनेक ढंगले विरोधीसँग मिलेर बदनामी भएका छन्। बदनामी कति भएका छन्, मधेस प्रदेशमा योजना बिक्री भएका छन्। हामीलाई थाहा छैन के हो? योजना बिक्री भएका छन्। १० प्रतिशत खाएका छन्। मन्त्रीले खाएका छन्। स्थानीय तहका जनप्रतिनिधिले खाएका छन्,’ वरिष्ठ उपाध्यक्ष पोखरेलले भने, ‘यी बदनामीवाला कुरा सुन्दा हाम्रो मन दुखेको छ। भगवानसँग प्रार्थना गरौं यहाँ यस्तो नहोस्। मानी लिऊँ यहाँ पनि भएको छ भने पार्टी डुब्छ कि डुब्दैन? कति ठूलो टोपी पहिरिएका छौं, त्यसको अर्थ छैन। तर पार्टी डुब्छ। देशको भाग्य र भविष्य पनि डुब्छ। बरबाद हुन्छ। त्यसैले यस्तो गर्ने अधिकार कसैलाई छैन।’
पोखरेलले मैथिलीमै उक्त कुरा भनेका थिए।
मधेस प्रदेशमा एमालेले जनमत पार्टीसँग सत्ता साझेदारी गरिरहेका छन्।
मधेस प्रदेश संसदीय दलका नेता सरोजकुमार यादव भौतिक पूर्वाधार विकास मन्त्री छन्। राजकुमार लेखी गृह, सञ्चार तथा कानुन मन्त्री छन्। शत्रुधनप्रसाद सिंह स्वाथ्य, जनसंख्या मन्त्री, प्रमोदकुमार जयसवाल खेलकुद तथा समाजकल्याण मन्त्री छन्।
नेतृत्व तहका नेताले आफ्नै पार्टीका मन्त्रीलाई सार्वजनिक कार्यक्रममा योजना बिक्री गरेको आरोप लगाएपछि उनीहरू क्रूद्ध बनेको प्रतिनिधिको बुझाइ छ।
‘यसै पनि यहाँ रघुवीर महासेठ, जुली महतो, हरिनारायण महतोको एउटा गुटा छ। उमाशंकर अरगरिया, सरोज यादव, रामचन्द्र मण्डल, सञ्जीव झाहरूको अर्को गुट छ। वरिष्ठ नेताले आएर घिउ थपिदिनुभयो। आगो बलिहाल्यो नि!,’ एक प्रतिनिधिले भने, ‘उमाशंकर अरगरिया लगायतको समूह हार्ने त पक्का थियो। तर मंगलबार अधिवेशनमा भएको झडप वरिष्ठ नेताको अभिव्यक्तिको विरोध पनि हो।’
भिडिओ:
-1746527126.jpeg)
