पाँचथरको मिक्लाजुङ गाँउपालिका वडा नं. ३ आरुबोटेमा सोमबार राति बमबहादुर फियाकसहित दुई परिवारको सामूहिक हत्यामा उनका कान्छा ज्वाइँ मानबहादुर माखिमको हात रहेको प्रहरीको अनुमान छ। मानबहादुर आफै झुण्डिएको अवस्थामा फेला परेका छन्।
ससुरा बमबहादुर र साढुभाइ शेर्मा परिवारका ९ जनाको हत्या गरिसकेपछि मानबहादुरले पनि घटनास्थल नजिकै झुण्डिएर हत्या गरेको हुन सक्ने नेपाल प्रहरीको उच्च तहका एक अधिकारीले बताए।
यो हत्यालाई हप्ता दिन अघिको नुनमा सिसा मिसाइएको घटनासँग जोडेर हेरिएको छ। हत्या गरिएका मध्ये मुना शेर्मा, मनकुमारी फियाकले हप्तादिन अघि नै खाएको खानामा सिसायुक्त नुन मिसिएको पाइएको थियो। उनीहरू बिरामी परेपछि सिसायुक्त खाना खाएको फेला परेको थियो।
नुनमा सिसा कसले राख्यो भन्ने विषयमा प्रहरी टुंगोमा नपुग्दै दुइजानाका परिवारै मारिएका छन्।
आरुबोटेमै सञ्चालित ढाका बुनाइ तालिममा सहभागी भएका उनीहरूले खाजामा राखिएको नुनमा मिसाइएको सिसा खाएको प्रहरी अनुमान थियो। उक्त घटनाको अनुसन्धान गरिरहेको प्रहरीले माखिमले नै नुनमा सिसा मिसाएको शंका गरे पनि पक्राउ भने गरिसकेको थिएन।
‘बमबहादुर फियाकका अर्का ज्वाइँ मानबहादुर माखिमले बमबहादुर र उनको घर नजिकै रहेको ज्वाइँ धनराज शेर्मा परिवारको हत्या गरेको अनुसन्धानबाट खुल्न आएको छ,’ ती उच्च प्रहरी अधिकारीले सेतोपाटीसँग भने, ‘अन्य कुरा पछि खुल्दै जाला।’
वडाध्यक्ष हस्तराज फियाकको भनाइले पनि प्रहरीको आशंकालाई पुष्टी गर्छ।
ज्वाइँ मानबहादुर -ससुरा बमबहादुरको मनमुटाव भएको वडाअध्यक्ष फियाकले बताए। उनका अनुसार, कान्छि छोरी र ज्वाँइको बारम्बार झगडा भएपछी बमबहादुरले मिलाउने कोसिस गरेका थिए। उनका अर्का ज्वाइँ धनराज शेर्माले पनि झगडा मिलाउन कोसिस गर्दै आएका थिए। तर, झगडा साम्य नभएपछि दुवैजना केही समय पहिलेदेखि अलग्गै बसिरहेका थिए। उनीहरूको घर मिक्लाजुङ्ग-७ मा पर्छ।
घटनामा शेर्मा र फियाकको घरका नौ जनाको हत्या भएको हो। हत्या गरिएका ज्वाइँ-ससुराको घर पन्ध्र मिनेट पैदल दूरी फरकमा छ। शेर्माको घर फियाकको भन्दा दक्षिण पर्छ।
हतियारधारी व्यक्तिले सोमबार मध्यरात पालैपालो दुवै परिवारलाई आक्रमण गरेको थियो। वडाध्यक्ष हस्तराज फियाकका अनुसार दुवै परिवार साधारण किसान हुन्।
‘यो परिवारसँग बाहिरका मान्छे कसैको दुश्मनी थिएन भन्ने बुझेका छौं,’ फियाकले सेतोपाटीसँग भने, ‘परिवारै सक्ने किसिमले हत्या भएको छ, यो परिवारसँग निर्मम हुनुपर्ने ठूलो कारण केही छैन।’
हत्या गरिएकाहरूमा ३६ वर्षीया जस्मिता फियाक, ४१ वर्षीय धनराज शेर्मा, २६ वर्षीया मनकुमारी फियाक, ६ वर्षीया इक्सा शेर्मा, १३ वर्षीया योवना शेर्मा, ८ वर्षीया मुना शेर्मा, ७४ वर्षीय बमबहादुर फियाक, उनकी श्रीमती पुर्सीमाया फियाक र १२ वर्षीया आशिका खजुम लिम्बू छन्।
सात दिनसम्म प्रहरीले नुनमा सिसा मिसाउने व्यक्ति पहिचान गर्न नसक्दा अर्को घटना घटेको अनुमान गर्न सकिने वडाध्यक्ष फियाक बताउँछन्। ‘शंका लागेका व्यक्तिलाई प्रहरीले किन यतिका दिन समाएन, यो हत्यामा उनै व्यक्तिको संलग्नता शंका भइरहेको छ,’ उनले भने, ‘प्रहरीको लापरबाहीले यत्रो घटना हुन पुगेको किन नभन्ने?’
एक गैरसरकारी संस्थाद्वारा सञ्चालित तीनमहिने ढाका तालिममा सहभागी भएका उनीहरूलाई गतआइतबार बिहान खुवाइएको खाजामा सिसा मिसाएको थाहा लागेपछि बुधबार अस्पताल भर्ना गरिएको थियो।
नुन कम लागेको भन्दै थप गरेको नुनमा सिसाका कणहरू भएको हुन सक्ने प्रहरी अनुमान थियो। भान्छामा राखिएको नुनको भाँडामा नै सिसा मिसाइएको भेटिएको थियो।
तालिमकी प्रशिक्षक समेत रहेकी स्थानीय होटल व्यवसाय गर्ने जसमिन फियाक लिम्बूको पसलमा त्यस्तो फेला परेपछि स्थानीयहरूले प्रहरीलाई खबर गरेका थिए।
गरिबी निवारणका लागि लघु उद्यम विकास कार्यक्रम अन्तर्गत मिलन केन्द्र नेपालको आयोजनामा जिल्ला घरेलु तथा साना उद्योग विकास समिति पाँचथरको आर्थिक सहयोगमा तालिम सञ्चालन गरिएको थियो। तालिमका ६ जना सहभागीसहित जसमिनकी छोरी र अन्य एक गरी ८ जनालाई अस्पताल भर्ना गरिएको थियो।
‘डिभोर्स’का कारण हत्या: प्रहरी
पाँचथरको आरुबोटेमा ९ जनाको सामूहिक हत्या ‘डिभोर्स’ का कारण भएको प्रहरीको प्रारम्भिक निष्कर्षले देखाएको छ।
घटनास्थल पुगेका प्रहरीले गरेको रिर्पोटिङको आधार, घटनालाई सूक्ष्म ढंगले अध्ययन गरिरहेको केन्द्रीय अनुसन्धान ब्युरो सिआइबी, अपराध अनुसन्धान विभाग र प्रहरी प्रधान कार्यालय आइजिपीको सचिवालय टोलीले सामूहिक हत्याको कारण ‘डिभोर्स’ नै हुन सक्ने निष्कर्ष निकालेको हो।
मानबहादुर र उनको श्रीमतीबीच पछिल्लो समय किचलो थियो। ‘उनीहरू डिभोर्सको अन्तिम तयारीमा थिए,’ उच्च प्रहरी स्रोतले भन्यो, ‘श्रीमतीलाई डिभोर्स गर्न सघाएको भन्दै मानबहादुरले साडु भाइ र ससुराको परिवार सबैलाई खसाप पारेको हुन सक्छ।’
पाँचथर हत्याकाण्डमा भागेर ज्यान बचाएकी १२ वर्षीया सीता खाजुमले कपडाले मुख छोपेर आएका एक व्यक्तिले खुकुरी हानेर परिवारका सबै सदस्य मारेको बयान दिएकी थिइन्।
प्रदेश नम्बर एक प्रहरी स्रोतका अनुसार बिहानपख सम्पर्कमा आएकी सीताले खाना खाएर सुतिसकेपछि आएका एक व्यक्तिले खुकुरी हानेर पालैपालो ज्यान लिएको बयान दिएकी छिन्।
घटनास्थलमा छानविन गर्न केन्द्रीय अनुसन्धान ब्युरोले प्रहरी उपरीक्षक उमाप्रसाद चतुर्वेदीको नेतृत्वमा टोली खटाइसकेको छ। प्रदेश नम्बर १ बाट पनि कुकुरसहितको टोली घटनास्थलमा पुगेको छ।
सम्बन्धित समाचारहरू :
पाँचथरमा दुई परिवारका नौ जनाको सामूहिक हत्या
पाँचथरको सामूहिक हत्या अनुसन्धान गर्न एसएसपी खत्री नेतृत्वमा टोली परिचालन
पाँचथरको आरुबोटे सामूहिक हत्याकाण्ड : एसपी चतुर्वेदी नेतृत्वको टोली घटनास्थलतर्फ प्रस्थान
आरुबोटे सामूहिक हत्याकाण्ड : एकै जनाले ९ जनाको हत्या गरेको प्रहरीको प्रारम्भिक निष्कर्ष
