बर्दियाको मधुवनका आन्दोलनरत स्थानीय सर्वसाधारण र स्थानीय प्रहरी प्रशासनका बीचमा सहमति कायम भएको छ। सहमति कायम भएसँगै तीन दिनदेखि अशान्त बनेको बर्दिया बुधबार बेलुकीदेखि शान्त बनेको छ।
जेठ २३ गते बिहान करिब साढे १० बजे बर्दियामा अस्मिता थारूलाई बाघले आक्रमण गरी घाइते बनाएको थियो। पटकपटक बाघले आक्रमण गरी मानिसहरू घाइते तथा मृत्युसमेत हुने गरेकाले बाघलाई नियन्त्रणमा लिनुपर्ने मागसहित स्थानीयहरू आन्दोलित बनेका थिए।
सोमबार प्रदर्शन क्रममा मधुवन नगरपालिका-२ को चना गाउँमा स्थानीय र प्रहरीबीच झडप भएको थियो। प्रर्दशनले उग्ररूप लिएपछि प्रहरीले नियन्त्रणका लागि अश्रुग्यास र गोली चलाएको थियो।
झडप क्रममा मधुवन नगरपालिका वडा नं. २ की १८ वर्षीया नविना थारूको मृत्यु भएको थियो। प्रहरीको गोली लागी नविनाको मृत्यु भएको भन्दै स्थानीयले आन्दोलन थप चर्काउँदै लगेका थिए।
बुधबार बल्ल सहमतिपछि मृतकको शव पोस्टमर्टम गर्ने र आफन्तले बुझेर लैजाने सहमति भएको छ।
स्थानीय र प्रहरी प्रशासनका बीचमा भएको सहमति अनुसार घटनास्थल ओराली बजार क्षेत्रमा नविनाको शालिक निर्माण गर्न स्थानीय सरकारले पहल गर्ने, उनलाई शहीद घोषणा गर्न केन्द्रीय सरकारलाई आग्रह गर्ने, क्षतिपूर्तिवापत २० लाख रूपैयाँ उपलब्ध गराउन गृह मन्त्रालयलाई अनुरोध गर्ने, स्थानीय सरकार अर्थात मधुवन नगरपालिकाले एक लाख रूपैयाँ प्रदान गर्ने जस्ता आठ बुँदे सहमति भएको छ।
त्यस्तै प्रहरीको गोली लागेर घाइते भएका मधुवन नगरपालिका वडा नं. २ सोनाहका २२ वर्षीय राकेशकुमार थारूको उपचारमा लाग्ने सम्पूर्ण खर्च बेहोर्न सरकारलाई आग्रह गर्ने सहमति पनि भएको छ। घाइते थारूको नेपालगञ्ज नर्सिङ होममा उपचार जारी छ। उपचारपछि पनि शारीरिक रूपमा अपांगता हुन गएमा सरकारको तर्फबाट थारूलाई सामाजिक सुरक्षाको प्रत्याभूति गरिदिन आग्रह गर्ने समझदारी भएको छ।
त्यस्तै जेठ २३ गते बाघको आक्रमणबाट घाइते भएकी ४१ वर्षीया अस्मिता थारूको सम्पूर्ण उपचार खर्च सरकारले बेहोर्ने, बाघको आक्रमणबाट जेठ १० गते मृत्यु भएकी ५४ वर्षीया कौसीदेवी पालको परिवारको लागि जनता आवास कार्यक्रम अन्तर्गत आवास व्यवस्थापन गरिदिन सरकारलाई आग्रह गर्ने सहमति भएको छ।
मधुवन नगरपालिका वडा नं. १ मध्यवर्ती क्षेत्र, वडा नं. २, ३, ४ र ५ खाता जैविकमार्ग क्षेत्रमा बाघ र मानवबीचको द्वन्द्व न्यूनीकरण गर्न तथा मानव बस्ती सुरक्षित गर्न २० किलोमिटरसम्मको दुरीमा तारबार गर्ने सहमति पनि भएको छ।
-copy-1761394385.jpg)
-1746009348.jpg)
