कोरोना भाइरसका कारण स्थगित भएको जर्मन बुन्डेस लिगा दुई महिनापछि सुरु भएको छ।
शनिबारदेखि सुरु भएको लिगमा दोस्रो स्थानको बोरुसिया डर्टमुन्डले सानदार जित हात पारेको छ। डर्टमुन्डले घरेलु मैदानमा भएको डर्बी भिडन्तमा साल्केलाई ४-० ले पराजित गर्यो।
खेलसँगै बुन्डेस लिगा कोरोना भाइरसपछि सञ्चालन हुने युरोपको पहिलो मुख्य लिग बनेको छ। खेल खाली रंगशालामा खेलाइएको थियो।
खाली रंगशालामा खेलाडी र प्रशिक्षकले बोलेका कुरा सनिएको छ । खेलमा समाजिक दूरीको नियम गोलपछिको सेलिब्रेसन र खेलाडी परिवर्तन गर्दा पालना गरिएको थियो।
डर्टमुन्डका लागि पहिलो गोल इर्लिङ ब्राउट हल्यान्डले गरे। उनले थोर्गान हजार्डले उपलब्ध गराएको क्रशमा २९ मिनेटमा गोल गरेका थिए।
डर्टमुन्डका लागि राफायल गुइरइरोले दुई गोल गरे। उनले खेलको ४५ र ६३ मिनेटमा गरी दुई गोल गरेका हुन्। यस्तै हजार्डले खेलको ४८ मिनेटमा अर्को गोल गरे।
८० हजार अट्ने डर्टमुन्डको रंशगालामा शून्य फ्यान भएपछि खेलाडीहरुले अन्तिम सिठ्ठीपछि रंगशाला फर्केर आफ्नो पुरानो शैलीमा खुसी मनाएको थियो। यसअघि हात समाएर फ्यानलाई सम्बोधन गर्ने भए पनि खेलाडीहरुले हात उचालेका थिए।
जितसँगै डर्टमुन्डले शीर्ष स्थानकोवायर्न म्युनिखसँगको अंक दूरी एकमा झारेको छ। वायर्नको २५ खेलबाट ५५ अंक र डर्टमुन्डको २६ खेलबाट ५४ अंक भएको छ। वायर्नले आइतबार खेल्दैछ।
लिगको अन्य खेलमा अग्सबर्गमाथि वुल्फवर्गले २-१ ले तथा होफेनहेममाथि हेर्था बर्लिङले ३-० को जित हात पारेका छन्। डुसेलडोर्फ र पडेरवर्नले गोलरहित बराबरी तथा आरबी लेइपजिङ र फ्रेइबर्गले १-१ गोलको बराबरी खेलेका छन्।