युक्रेनले युरो २०२० मा पहिलो जित हात पारेको छ। बिहीबार साँझ रोमानियाको बुचारेस्टमा भएको खेलमा युक्रेनले नर्थ म्यासेडोनियालाई २-१ गोलले पराजित गरेको हो।
समूह 'सी' मा यसअघि युक्रेन पहिलो खेलमा नेदरल्यान्ड्ससँग ३-२ गोलले पराजित भएको थियो। म्यासेडोनियाको भने यो दोस्रो हार हो। म्यासेडोनियालाई पहिलो खेलमा अस्ट्रियाले ३-१ गोलले पराजित गरेको थियो।
बिहीबार जित हात पारेसँगै युक्रेनले युरो कपमा लगातार ६ खेलमा पराजयको खराब यात्रालाई अन्त्य गरेको छ।
युक्रेनका लागि खेलको २९ मिनेटमा एन्ड्री यरमोलेन्कोले गोल गर्दै अग्रता दिलाए।
३४ मिनेटमा युक्रेनले अग्रता दोब्बर पार्यो।
यसपटक रोमन यरेमचुकले गोल गरे। उनलाई गोल गर्न यरमोलेन्को पास दिएका थिए।
दोस्रो हाफमा खेलमा सुधार ल्याएको म्यासेडोनियाले ५७ मिनेटमा एलोस्कीको गोलबाट अग्रता लियो।
सुरुमा उनको पेनाल्टी प्रहारलाई युक्रेनका गोलकिपर बुस्चानले फर्काए। रिबाउन्डमा उनले गोल गर्दै म्यासेडोनियालाई खेलमा फर्काउने कोशिस गर्यो।
८४ मिनेटमा युक्रेनले पेनाल्टी पायो। म्यासेडोनियाका अभ्रामोभ्सीले बक्सभित्र ह्यान्ड गरेपछि युक्रेनका रुस्लान मलिनोभ्स्कीले पेनाल्टी प्रहार गरे। तर उनको प्रहारलाई म्यासेडोनियाका गोलकिपर दिमित्रेभ्सीले विफल पारे।
अब समूह 'सी' को अन्तिम चरणको खेलमा युक्रेन र अस्ट्रिया तथा म्यासेडोनिया र नेदरल्यान्ड्सबीच खेल हुनेछ।
आजको दोस्रो खेलमा राति ९:४५ बजे डेनमार्क र बेल्जियमबीच खेल हुनेछ।
डेनमार्कको राजधानी कोपनहगेनमा हुने समूह 'बी' को खेल बेल्जियमले डेनमार्कका मिडफिल्डर क्रिस्टियन एरिक्सनलाई सुम्पिन चाहेको छ।
एरिक्सन फिनल्यान्डविरुद्धको अघिल्लो खेलमा मैदान ढलेर बेहोस भएका थिए। पछि उनको अस्पताल लाने क्रममा होस खुलेको थियो। सो खेलमा फिनल्यान्डले डेनमार्कलाई १-० ले पराजित गरेको थियो।
बेल्जियमले पहिलो खेलमा पनि जित निकालेकाले लगातार दोस्रो जितसहित अन्तिम १६ मा पुग्न चाहान्छ।
दुई टिमबीच अहिलेसम्म १५ पटक प्रतिस्पर्धा भएकोमा दुवैले समान ६-६ खेलमा जित हात पारेका छन्। तीन खेल भने बराबरीमा सकिएका छन्।
राति १२:४५ बजे समूह 'सी' को खेलमा नेदरल्यान्ड्स र अस्ट्रिया भिड्दैछन्।
खेल नेदरल्यान्ड्सको आम्स्टर्डममा हुँदैछ। दुवै टिम पहिलो खेलमा विजयी भएकाले लगातार दोस्रो जितको खोजीमा हुनेछन्।
नेदरल्यान्ड्सले पछिल्ला ६ खेलमा १९ गोल गरेको छ। ती सबै खेलमा नेदरल्यान्ड्स विजयी भएको छ।
