मुक्तिनाथ विकास बैंकले यस आर्थिक वर्षको तेस्रो त्रैमाससम्मको वित्तीय विवरण प्रकाशित गरेको छ।
प्रकाशित तेस्रो त्रैमाससम्मको वित्तीय विवरण अनुसार विकास बैंकको इतिहासमा पहिलो पटक यो बैंकले १ अर्बमाथि नाफा कमाएको हो।
गत आर्थिक वर्षको सोही अवधिसम्मा बैंकले ६७ करोड ६० लाख ३४ हजार रुपैयाँ खुद नाफा आर्जन गरेको थियो।अहिले चालु आर्थिक वर्षका चैत मसान्तसम्ममा १ अर्ब ५६ लाख ३० हजार रुपैयाँ खुद नाफा आर्जन गरेको छ। यो गत सालको तुलनामा ४७.७५ प्रतिशतले बढी हो।
बैंकको खुद नाफा उकालो लागे सँगै बैंकको प्रति सेयर आम्दानी पनि उकालो लागेको छ। बैंकको प्रतिशेयर आम्दानी ९ रुपैयाँ १४ पैसा बढेर २७ रुपैयाँ ८७ पैसा पुगेको छ। त्यस्तैगरी बैंकको वितरण योग्य मुनाफा ८२ करोड ८७ लाख १९ हजार रुपैयाँ पुगेको छ।
गत आर्थिक वर्षका तुलनामा चुक्ता पूँजी ११.२५ प्रतिशतले बढेको छ। त्यस्तैगरी जगेडा कोष २४.९७ प्रतिशत बढेको छ भने निक्षेप ४३.५० प्रतिशत र कर्जा ५०.७६ प्रतिशतले बढेको बैंकको तेस्रो त्रैमाससम्मको अपरिष्कृत वित्तीय विवरणमा उल्लेख छ।
दोस्रो त्रैमासमा रहेको निष्क्रिय कर्जा ०.३ं० प्रतिशत रहेकोमा तेस्रो त्रैमासमा ०.२१ प्रतिशतमा झरेको छ। यस आर्थिक वर्षको तेस्रो त्रैमाससम्ममा बैंकको लाभांश दिने क्षमता १७.२२ प्रतिशत रहेको छ भने गत आर्थिक वर्षको तेस्रो त्रैमासमा बैंकको लाभांश दिने क्षमता ८.९७ प्रतिशत थियो।
बैंकले लघु तथा साना उद्यमीहरु लक्षित गरी उत्पादनमूलक क्षेत्रमा लगानीलाई प्राथमिकतामा राखेको छ। बैंकको कुल कर्जामा ५० प्रतिशत हिस्सा २० लाख रुपैयाँ मुनिको र ३३ प्रतिशत हिस्सा १० लाख मुनिको कर्जामा छ।
शाखा सञ्जाल विस्तारको क्रमलाई बैंकले निरन्तरता दिएको छ। हाल यस विकास बैंकको १५६ ओटा शाखाहरु सञ्चालनमा रहेका छन् भने सम्भाव्य अन्य क्षेत्रमा शाखा विस्तारको क्रमलाई जारी राखेको छ।
बैंकिङ्ग क्षेत्रमा नै एक अब्बल बैंक बनाउनको लागि दीर्घकालीन रणनीति कार्यान्वयनमा ल्याई बैंकको जोखिम व्यवस्थापन प्रणाली, आन्तरिक नियन्त्रण प्रणाली, प्रविधिको स्तरोन्नति, शाखा सञ्जाल विस्तार, डिजिटलाइजेसन, अटोमेसन अनुभवी व्यवस्थापन समिति गठन गरेर सेवाको गुणस्तर अभिबृद्धि गरी बैंकको ब्राण्ड, ख्याती, साथै व्यवसायको बजार हिस्सा विस्तार हुने गरी अगाडि बढेको छ।
प्रतिस्पर्धी बजारमा बैंकलाई उत्कृष्ट र मजबुत बनाउन बैंकले अनुपालना, संस्थागत सुशासनलाई उच्च प्राथमिकता राखेर अघि बढेको छ। साथै बैंकले सामाजिक उत्तरदायित्व अन्तर्गत विभिन्न कार्यक्रममा पनि सक्रिय योगदान गर्दै आएको छ।
विकास बैंकले डिजिटल कारोबारलाई प्रोत्साहन गर्न भिसा नेटवर्क अन्तर्गतको जुनसुकै बैंकको एटिएम मेसिनबाट विना कुनै शुल्क रकम झिक्न सकिने व्यवस्था गरेको छ।
त्यसै गरी मोबाईल बैंकिङ्ग, क्यूआर कोड स्क्यान, अनलाइन कर्जा आवेदन, अनलाइन खाता खोल्ने, ईन्टरनेट बैंकिङ्ग, खाता मै रेमिट्यान्स जम्मा आदि जस्ता आधुनिक प्रविधिमा आधारित सेवाहरु बैंकको शाखामा उपस्थित नभई घरबाट नै गर्न सकिने व्यवस्था गरेको छ।
नेपालको बैंकिङ्ग क्षेत्रमा भित्रिएका प्रायः सबै प्रविधिहरु यस विकास बैंकले प्रयोगमा ल्याएको छ।