हिमालय एयरलाइन्सले काठमाडौंबाट चीनको राजधानी बेइजिङमा नियमित उडान गर्ने भएको छ। ४९ प्रतिशत चिनियाँ लगानी भएको एयरलाइन्सले बेइजिङको नयाँ अन्तर्राष्ट्रिय विमानस्थलमा नियमित उड्ने निश्चित भएको छ।
एयरलाइन्सका उच्च अधिकारीका अनुसार एयरलाइन्सले बेइजिङको नयाँ डाक्सिङ अन्तर्राष्ट्रिय विमानस्थल सञ्चालनमा उडान गर्ने भएको छ। उक्त विमानस्थल सेप्टेम्बरबाट सञ्चालन हुने बताइएको छ। त्यसपछि उडान गर्नेगरी एयरलाइन्सले तयारी गरिरहेको छ। उडानको मिति भने तय भएको छैन।
'हामीले डाक्सिङका लागि तयारी गरिरहेका छौं अहिले यसका लागि तयारीहरु भइरहेका छन्' एयरलाइन्स सम्बद्ध स्रोतले भन्यो,' उडान अनुमति करिब पाइसकिएको छ, केही तयारीपछि हामी मितिसहित घोषणा गर्छौ।'
एयरलाइन्ले बेइजिङ उडानका लागि लामो समयदेखि प्रयास गरिरहेको थियो। अहिलेको बेइजिङ क्यापिटल विमानस्थल साँघुरो भएकाले नेपाली एयरलाइन्सलाई ‘स्लट’ नदिएको चीनले नयाँ विमानस्थल बनेपछि ‘स्लट’ दिने वचन दिएको थियो। सोही बचनअनुसार चिनियाँ पक्षले व्यावसायिक उडानको अनुमति दिने निश्चित भएको एयरलाइन्सका उच्च अधिकारीले सेतोपाटीलाई जानकारी दिए।
उडान तयारीका लागि एयरलाइन्सलाई केही समय भने लाग्ने छ। प्रशासानिक प्रक्रियादेखि अन्य तयारीका काम अहिलेदेखि नै शुरु भएको एयरलाइन्सले जानकारी दिएको छ।
अहिले एयरलाइन्ससँग अहिले भएका जहाजबाट व्यावसायिक उडान भने सम्भव हुने छैन। जहाज ल्याउने प्रक्रिया पनि शुरु गरिसकेको अधिकारिहरुले बताएका छन्।
यसअघि पनि हिमालयले चीनमा चार्टर उडान अनुमति पाएको थियो। हालसम्म काठमाडौंबाट बेइजिङ सिधा उडान छैन।
एयरलाइन्सले बेइजिङसँगै चीनका अन्य गन्तव्यमा पिन उडान गर्ने तयारी गरेको छ। आजै सम्पन्न हवाइ सेवा सम्झौता पुनरावलोकनबाट नयाँ आठ विमानस्थलमा नेपाली एयरलाइन्सले उडान गर्न पाउने भएपछि उसले उडान प्रक्रिया शुरु गर्ने जानकारी दिएको छ।
भारतको नयाँ दिल्ली उडान अनुमति नपाएपछि एयरलायन्सले बेइजिङ उडान गर्ने तयारी गरेको थियो। लामो समयदेखि दिल्ली उडान पाएको छैन।