ट्रेकिङ एजेन्सी एसोसिएसन अफ नेपाल टान पश्चिमाञ्चलले पदयात्रामा जाने पर्यटकलाई विभिन्न स्थानीय तहले रोकेको भन्दै ध्यानाकर्षण गराएको छ।
गण्डकी प्रेदशमा रहेका ११ वटै जिल्ला समन्वय समितिलाई ज्ञापन पत्र पठाएर टानले पदयात्रालाई सहजीकरण गरिदिन ध्यानाकर्षण गराएको हो।
टान पश्चिमाञ्चलका अध्यक्ष हरी भुजेलले जिल्ला समन्वय समिति कास्कीका प्रमुख बैनबहादुर क्षेत्रीलाई ध्यानाकर्षण पत्र बुझाएर पदयात्रा सुचारु गर्ने वातावरण बनाउन आग्रह गरेका छन्। स्थानीय तहहरुले आ–आफ्नो पालिकामा प्रवेश गर्न आफ्नै नीति लागू गरेको भन्दै ध्यानाकर्षण गराएको भुजेलले बताए।
सरकारले असोज १ गतेदेखि होटल, रेष्टुरेण्ट, पदयात्रा लगायत पर्यटन क्षेत्र खुलाएको थियो। टानले विदेशी मात्र नभई स्वदेशी पदयात्रीलाई समेत रोक्ने गरी स्थानीय तहले निषेध गरेको भन्दै अब स्थानीय तहसँग समन्वय गरेर खुला गर्न आग्रह गरेको छ ।
गण्डकी प्रदेशमा ११ जिल्लामा नवलपुर बाहेक बाँकी १० वटै जिल्ला पदयात्रा र पर्वतारोहणका लागि उपयुक्त क्षेत्र छ।
यही क्षेत्रमा अन्नपूर्ण संरक्षण क्षेत्र, मनास्लु संरक्षण क्षेत्र, ढोरपाटन शिकार आरक्ष लगायत पर्यटकीय गन्तव्य छन् । पर्यटन क्षेत्रलाई लयमा फर्काउन आन्तरिक पर्यटक र पदयात्रीलाई आफुहरुले प्रोत्साहित गरेको टान पश्चिमाञ्चलका अध्यक्ष भुजेलले बताए ।
ध्यानाकर्षण बुझ्दै जिल्ला समन्वय समिति, कास्कीका प्रमुख क्षेत्रीले स्थानीय तहसँग समन्वय गरेर निषेध खुलाउन सहजीकरण गर्ने प्रतिवद्धता जनाएका छन् । उनले पर्र्यटन क्षेत्रलाई पुरानै लयमा फर्काउन आफुले सक्दो सहयोग गर्ने बताए ।
पदयात्रामा जाने पर्यटकलाई सरकारले तोकेको स्वास्थ्य मापदण्ड पुरा गर्न ट्रेकिङ एजेन्सीहरु तयार रेहेको भुजेलले बताए । ‘पर्यटन क्षेत्रलाई पुरानै लयमा फर्काउन हामी लागेका छौं’, उनले भने, ‘पदयात्राको थालनीले एजेन्सी, होटल र रेष्टुरेण्ट मात्र नभई ग्रामिण अर्थतन्त्रलाई पनि टेवा पु¥याउँछ ।’