सन् २०१८ मा न्यूजिल्याण्डमा हुने आइसीसी यू-१९ विश्वकप क्रिकेटका लागि एसियन छनोटको पहिलो खेलमा नेपालले सिंगापुरसँग ७४ रनको लक्ष्य पाएको छ।
सिंगापुर क्रिकेट क्लबमा टस हारेर पहिले ब्याटिङ गरेको घरेलु टोली नेपाली बलरसामु निरिह साबित भए।
सिंगापुर २९ ओभरमा अल आउट हुँदै ७३ रन मात्र बनाउन सक्यो। सिंगापुरलाई सस्तैमा समेट्ने क्रममा नेपालका लागि सन्दिप लामिछानेले ५ विकेट लिए। यस्तै साहब आलमले ३ र किशोर महतोले २ विकेट लिए।
सिंगापुरका लागि ब्रिगु लायरले सर्वाधिक ४२ तथा सेन अग्रवालले ११ रन बनाउनुबाहेक अरूले दोहोरो रनको स्कोर छुन सकेनन्। सिंगापुरका चार खेलाडी शून्यमा आउट भए।
जवाफी ब्याटिङ थालेको नेपालले आफ्नो पहिलो विकेट गुमाएको छ। नेपालका ओपनर सन्दिप सुनार ९ बल खेल्दै १ रन बनाएर आउट भए।
प्रतियोगितामा एसियाका शीर्ष चार राष्ट्र अफगानिस्तान, नेपाल, मलेसिया र आयोजक सिंगापुरका युवा टोलीले प्रतिस्पर्धा गर्नेछन्।
डबल राउण्ड रोविन लिगका आधारमा हुने छनोटपछि शीर्ष स्थानमा रहने टोली अर्को वर्ष हुने युथ विश्वकपका लागि छनोट हुनेछ।।
