ओमान क्रिकेटले सन् २०२४ को आइसिसी टी-२० विश्वकप खेलेका राष्ट्रिय टोलीका खेलाडीलाई पुरस्कार रकम दिन तयार भएको जनाएको छ।
विश्वकपमा सहभागी भए बापत आइसिसीबाट प्राप्त हुने रकम दिन ओमान तयार भएको हो। विश्वकप खेलेको एक वर्षपछि पुरस्कार दिन तयार भएको ओमानले यसलाई ‘प्रक्रियागत ढिलाइ’ भएको दाबी गरेको छ।
सोमबार एक विज्ञप्ति जारी गर्दै आइसिसीबाट प्राप्त हुने २ लाख २५ हजार अमेरिकी डलर बराबरको रकम टोलीका खेलाडी र सपोर्ट स्टाफलाई जुलाई २०२५ सम्म दिने ओमान क्रिकेटले बताएको हो।
यसअघि ओमान क्रिकेट टोलीका तत्कालिन खेलाडीले एक वर्षसम्म पुरस्कार रकम नपाएको सार्वजनिक भएको थियो।
पुरस्कार रकम आइसिसीबाट प्राप्त भएको २१ दिनभित्र खेलाडीहरूलाई वितरण गरिसक्नुपर्ने व्यवस्था छ। आइसिसीले पुरस्कार रकम समयमै दिएको थियो।
त्यसपछि खेलाडीहरुले प्रतियोगिता सकिएको केही समयपछि नै भुक्तानी नभएको विषय उठाएका थिए। खेलाडीहरुले पुरस्कार रकम नदिए नखेल्ने चेतावनी दिएका थिए। तर उल्टै एसिसी इमर्जिङ टिम्स कप हुनुभन्दा एक दिनअघि ओमानले खेलाडीलाई टोली छाड्न निर्देशन दिएको थियो।
त्यसपछि १५ सदस्यीय टोलीका ११ खेलाडीको केन्द्रीय सम्झौता निलम्बन गरिएको थियो भने धेरैले ओमान नै छाड्न बाध्य भएका थिए।
धेरैजसो खाडी मुलुकमा आवासीय अनुमति रोजगारीसँग जोडिएको हुन्छ र यस अवस्थामा धेरै खेलाडीहरूको रोजगारी खोसिएपछि उनीहरू देश छोड्न बाध्य भए।
