निर्वाचन आयोगले मतदाता नामावलीका लागि समय दिएपछि जिल्लामा गत एक सातामा दुई हजार ४ सय २७ जनाले फोटो खिचाएका छन् । जसमध्ये एक हजार ३ सय १५ जना महिला छन् भने पुरुषको संख्या एक हजार १ सय १२ छ ।
महिलाको उत्साहजनक सहभागिता रहेको जिल्ला निर्वाचन कार्यालय चितवनका प्रमुख हरि ढकालले बताए । जिल्ला निर्वाचन कार्यालय चितवनमा यसअघि फोटो खिच्न छुटेर मतदान गर्न नपाएका र उमेर पुगेकाले फोटो खिचाउने अवसर पाएका हुन् ।
जिल्ला निर्वाचन कार्यालय चितवनका प्रमुख ढकालले १६ वर्ष पुगेर नागरिकता लिएकाले फोटो खिचाएर मतदाता नामावलीमा नाम लेखाउन पाउने बताए । तर मतदान गर्न भने १८ वर्ष पूरा हुनुपर्ने प्रावधान छ । जिल्लामा हालसम्म तीन लाख १३ हजार तीनजना मतदाता छन् । जिल्लाका भरतपुरबाहेकका ६ वटा स्थानीय तहमा भने साउन १६ गतेबाट ३२ गतेसम्म फोटोसहितको नामावली दर्ता गराइने भएको छ । रासस
