नेपाल–भारत प्रबुद्ध समूहका नेपाल तर्फका संयोजक एवम् पूर्वराजदूत भेषबहादुर थापाले प्रधानमन्त्री केपी शर्मा ओलीको तीन दिने भारत भ्रमणमा १९५० को सन्धिबारे कुरै नहुने स्पष्ट पारेका छन्।
प्रधानमन्त्री ओलीको भारत भ्रमणको पूर्वसन्ध्यामा सोमबार राजधानीमा आयोजित साक्षात्कारमा बोल्दै पूर्वराजदूत थापाले सो कुरा बताएका हुन्। थापाले प्रधानमन्त्रीको भ्रमण सफल र फलदायी हुने पनि विश्वास दिलाए।
उनले वर्तमान सरकारले अघि सारेको प्राथमिकताकै आधारमा आन्तरिक तथा बाहृय सम्बन्धहरू अघि बढ्नेमा आफू विश्वस्त रहेको सुनाए। उनले भने,‘अहिलेको सरकारको मुख्य ‘फोकस’ नै राष्ट्रियतालाई बलियो बनाउने, राष्ट्रिय स्वार्थलाई अघि बढाउने र जनतालाई समृद्धि दिने नै हो, संवाद गर्दा यिनै कुरामा ध्यान दिनुपर्छ।’
थापाले भ्रमणमा नयाँ सम्झौता गर्नुभन्दा पनि भएका सम्झौताहरू कार्यान्यवनमा जोड र आर्थिक समृद्धि हासिल गर्ने विषयमा केन्द्रीत रहेर कुरा गर्न सुझाव समेत दिएका छन्।
साक्षात्कारमा बोल्दै उनले नेपालमा निर्वाचन सम्पन्न भएसँगै स्थायी प्रकृतिको सरकार बनेको सुनाए।
उनले भने,‘अहिले वातावरण फेरिएको छ, चुनापछि भारत र स्वयम् भारतीय प्रधानमन्त्री नरेन्द्र मोदीले पनि नेपालका तीन जना नेतालाई फोन गरेर बधाई दिनुभयो, यसले पनि के देखाउँछ भने अहिले वातावरण फेरिएको छ।’
थापाले प्रधानमन्त्रीको भारत भ्रमण सफल हुनेमा आफू पूर्ण विश्वस्त रहेको बताए।
भारतसँग आजभन्दा करिब १८ वर्षअघि पञ्चेश्वर आयोजनामा हस्ताक्षर भएपनि अहिलेसम्म त्यो अगाडि नबढ्नु दुःखदायी कुरा भएको उनको गुनासो थियो। ‘अहिले त भनेर भन्दा पनि गरेर देखाउने बेला आएको छ,’–थापाले थपे।
प्रधानमन्त्री ओलीको भारत भ्रमणमा १९५० को सन्धिबारे कुरा उठ्छ त भनेर पत्रकारले सोधेको एक प्रश्नमा उनले यो विषय भ्रमणसँग सम्बन्धित नरहेको स्पष्ट पारे। थापाले नेपालले अब संविधान र संविधान कार्यान्वयनले देखाएको बाटो हिँड्ने बताउँदै मुलुकको हितको लागि आपसी समझदारी अनिवार्य रहेको बताए।
भारतसँग भएको १९५० को सन्धिबारे अहिलेसम्म गहिरिएर र करेक्सन गर्नेबारे गृहकार्य नभएको गुनासो पोख्दै उनले भने,‘तर अहिले यो विषयले हाई–लेभलमा प्रवेश पाएको छ, यसलाई समसामयिक बनाउन र विगतमा भएका तित्तता कम गर्ने गरी हामीले ‘होमवर्क’ गरिरहेका छौं।’
थापाले यो विषय संवेदनशील र अभ्यास गम्भीर रहेकोले आफूहरू सन्धि, व्यापार, पानी, सीमा, सुरक्षा आदि विषयमा तथ्यमा छलफल गरेर निश्कर्षमा पुग्ने जनाए। उनले भने,‘हामीले निकालेको निश्कर्ष दुवै पक्षबाट स्वीकार हुन्छ।’
त्यस्तै, उनले भारतसँग रहेको व्यापार घाटा कम गर्नको लागि नेपालले उत्पादन बढाउनुपर्नेमा जोड दिए।
उनले थपे,‘उत्पादन भएपछि मात्रै देशको प्रगति हुन्छ, नेपालीहरूले पसिना र रगत बेच्ने र चामल, नून, तेल किन्ने गरेका छन्, हामीले मानवीय स्रोत ‘एक्सपोर्ट’ गर्ने अनि ‘कमोडिटी इम्पोर्ट’ गरिरहेका छौं।’
https://www.youtube.com/watch?v=dXdauT2iqNc&feature=youtu.be
