प्रधानमन्त्री केपी शर्मा ओली यही जुन १० तारिख बेलायतको औपचारिक भ्रमणमा आउने कार्यक्रम तय भएको छ।
बेलायती प्रधानमन्त्री टेरेसा मे को निमन्त्रणामा बेलायत आउन लागेका प्रधानमन्त्री ओलीले बेलायती समकक्षी समक्ष द्विपक्षीय हितका बारेमा कुराकानी गर्ने भएका छन्। लन्डनस्थित नेपाली दुतावासका अनुसार उनले जुन १० तारिख साँझ अक्सफोर्ड विश्वविद्यालयद्वारा आयोजित कार्यक्रमलाई सम्बोधन गर्ने छन्।
प्रधानमन्त्री ओलीले जुन ११ तारिखमा बेलायती प्रधानमन्त्री टेरेसा मे संग भेट वार्ता गर्ने कार्यक्रम रहेको छ। नेपाली दूतावास लन्डनका उपनियोग प्रमुख शरद राज आरणका अनुसार वार्ता द्विपक्षीय सम्बन्ध र सहयोगका बारेमा केन्द्रित हुनेछ।
‘नेपाल –बेलायत ऐतिहासिक सम्बन्धलाई मध्यनजर गर्दै आपसी हित र सहकार्यलाई प्रगाढ बनाउने दिशामा वार्ता केन्द्रित हुन्छ’ सेतोपाटीसंगको कुराकानीमा आरणले भने। प्रधानमन्त्री ओलीले सरकारका अन्य पदाधिकारीहरुसँग पनि भेटवार्ता गर्ने कार्यक्रमको तयारी भईरहेको जनाईएको छ।
प्रधानमन्त्री ओली १२ जुनको बिहान नेपाली दूतावासले आयोजना गर्ने रिसेप्सनमा सहभागी हुने कार्यक्रम छ । साथै उनले बेलायतमा समान सुविधाको माग राख्दै आन्दोलनरत गोर्खा तथा नेपाली समुदायसँग पनि समसामयिक बिषयमा अन्तरक्रिया गर्ने जनाईएको छ।
यस भन्दा पहिले सन् २००२ मा तत्कालीन प्रधानमन्त्री शेर बहादुर देउवाको औपचारिक भ्रमण भएको १७ बर्ष पछि प्रधानमन्त्री ओलीले बेलायतको औपचारिक भ्रमण गर्न लागेका हुन्।
जेनेभाको आइएलओ सम्मेलनमा सहभागी भएपछि लन्डन आउन लागेका प्रधानमन्त्री ओली जुन १२ मा फ्रान्स जाने बताईएको छ ।
