कर्णाली प्रदेशका मुख्यमन्त्री महेन्द्र बहादुर शाहीले अत्यावश्यक बाहेकका सबै भेटघाट बन्द गरेका छन्। कोरोना संक्रमणको जोखिम कम गर्न अत्यावश्यक बाहेकका भेटघाट सोमबारदेखि बन्द गरिएको मुख्यमन्त्रीका राजनीतिक सल्लाहकार भिमप्रकाश शर्माले जानकारी दिए।
मुख्यमन्त्री शाहीले कोरोना भाइरस (कोभिड–१९)ले निम्त्याएको संकटको समाधानका लागि उच्च सावधानी अपनाउन सर्वसाधारण नागरिकलाई समेत आग्रह गरेको सल्लाहकार शर्माले जानकारी दिए।
‘विश्वव्यापी समस्याको रूपमा रहेको कोरोना भाइरसको संकट समाधान गर्न स्वास्थ्य निर्देशिकाको अनिवार्य रूपमा पालना गर्नु अहिलेको मुख्य दायित्व रहेको भन्दै मुख्यमन्त्री शाहीले सबै नागरिकलाई सचेत र सतर्क रहन आग्रह गर्नुभएको छ,’ राजनीतिक सल्लाहकार शर्माले भने।
आवश्यक हिँडडुल नगर्न, भेटघाट नगर्न, भीडभाड तथा बजारमा नजान, स्वास्थ्य संस्था तथा स्वास्थ्यकर्मीले दिएको सुझाव अवलम्बन गर्न पनि मुख्यमन्त्री शाहीले आग्रह गरेका छन्।
कोरोनाभाइरसको रोकथाम र नियन्त्रणका लागि प्रदेश सरकार गम्भीर रूपमा लागिरहेको भन्दै मुख्यमन्त्री शाहीले हल्लाको पछि नलाग्न पनि सर्वसाधारणलाई आग्रह गरेका छन्।
