निर्वाचन क्षेत्र बाँडफाँटका लागि सत्ता गठबन्धनका दलहरूबीच छुट्टाछुट्टै बैठक चलिरहेको छ।
प्रधानमन्त्री निवास बालुवाटारमा अहिले कांग्रेस र नेकपा एकीकृत समाजवादीका नेताहरूको बैठक बसेको छ।
पाँच दलीय गठबन्धनको बैठकमा दलहरूले छुट्टाछुट्टै बैठक गरेर सामूहिक छलफल गर्ने सहमति भएको थियो।
'हामी आजै राति बस्न पनि सक्छौं। भोलि बिहान हुन पनि सक्छ,' गठबन्धनमा अबद्ध दलका एक नेताले भने, 'निर्वाचन क्षेत्र बाँडफाँटका लागि अब अन्तिम प्रयास गर्दैछौं। विवादहरू साँघुरिँदै गएका छन्।'
गठबन्धनको सिट बाँडफाँटमा नेकपा एकीकृत समाजवादी र जसपाले असहमति जनाएका छन्। एकीकृत समाजवादीले कम्तीमा २५ सिट दाबी गरेको छ। यद्यपि उसले २० सिट भए पनि चाहिने भनिरहेको स्रोतको दाबी छ।
जसपाले भने २२ सिट नपाए गठबन्धन छाडेर अरू दलसँग तालमेल गर्ने चेतावनी दिइरहेको छ। उसले पनि १८ देखि २० सिटका लागि प्रयास गरेको स्रोतको दाबी छ।
यसैबीच जसपा अध्यक्ष उपेन्द्र यादवले गठबन्धनमा तानातान भएकाले निर्वाचन क्षेत्र बाँडफाँटको टुंगो लाग्न नसकेको बताएका छन्।
सेतोपाटीसँग संक्षिप्त कुराकानी गर्दै जसपा अध्यक्ष यादवले बुधबारको बैठकमा कुनै सहमति नभएको दाबी गरे।
'आज पनि हामी बैठक बसेको हो। कुरा मिलेको छैन। हामीले भनेको न्यूनतम सिट दिन गठबन्धनमा रहेका दलहरू तयार भएका छैनन्,' जसपा अध्यक्ष यादवले भने, 'भोलि बैठक बस्ने कि नबस्ने भन्ने टुंगो छैन। बस्ने भएछ भने खबर आउला।'
उनले अहिलेसम्मको वार्ताले सकारात्मक निष्कर्ष निकाल्न नसकेको बताए।
