उपनिर्वाचन नजिकिएपछि केही दिनदेखि राजनीतिक माहौल तातेको छ।
वैशाख १० मा तनहुँ- १, चितवन- २ र बारा-२ मा उपनिर्वाचन हुँदैछ। सोमबार तीनै क्षेत्रमा उम्मेदवारी दर्ताको कार्यक्रम छ।
उपनिर्वाचनमा एकतावद्ध भएर जाने सन्देश दिन नेपाली कांग्रेसले तीन जिल्लाका नेता, कार्यकर्तामाथिको कारबाहीसमेत फुकुवा गर्ने निर्णय गरेको छ।
कांग्रेसले पूर्वसहमहामन्त्री गोविन्दराज जोशीलगायत नेता तथा कार्यकर्तालाई गरिएको अनुशासनको कारबाही फुकुवा गर्ने निर्णय आइतबार केन्द्रीय कार्यसम्पादन समिति बैठकबाट गरेको हो।
सहमहामन्त्री बद्री पाण्डेले तनहुँ, चितवन र बाराका नेता, कार्यकर्तामाथि गरिएको अनुशासन कारबाही फुकुवा गर्ने निर्णय भएको बताए।
उनकाअनुसार ०७९ को चुनावबाहेक त्यसअघि भएका चुनावमा पार्टीका आधिकारिक उम्मेदवारविरूद्ध उम्मेदवारी दिएका कांग्रेसका नेता, कार्यकर्ताको क्रियाशील सदस्यता अब निरन्तर रहने निर्णय भएको छ।
पूर्वसहमहामन्त्री जोशीलाई २०७४ को चुनावमा तनहुँ १ मा कांग्रेसका तत्कालीन उम्मेदवार रामचन्द्र पौडेललाई हराउन भूमिका खेलेको आरोप थियो। २०७५ पुस २४ गते कांग्रेसले जोशीमाथि कारबाही गरेको थियो।
कांग्रेसले कारबाही गरे पनि जोशीले पार्टी छाडेनन्। बरू तनहुँमा समानान्तर समिति गठन गरे, बिपी समाज र कांग्रेस स्वतन्त्र समूहमार्फत् राजनीतिक गतिविधिमा सक्रिय रहिरहेका छन्।
जोशी गत मंसिर ४ को चुनावमा पनि तनहुँ १ मा रामचन्द्र पौडेलसँग प्रतिस्पर्धामा उत्रिएका थिए। जोशी स्वतन्त्र हिसाबले उम्मेदवार थिए। यहाँ पौडेलले २५ हजार तीन सय १८ मतसहित चुनाव जिते। जोशीले भने ६ हजार ८ सय ७८ मत ल्याएका थिए। यहाँ एमाले, रास्वपालगायतबाट पनि उम्मेदवार थिए।
तनहुँ १ बाट जितेका पौडेल गत फागुन २५ मा राष्ट्रपति बने। यसपछि यो क्षेत्र रिक्त भयो। जोशीले पुन: यो क्षेत्रमा उम्मेदवारी दिने वा नदिनेबारे निर्णय गरिसकेका छैनन्।
उनले आज दमौलीमा भेला राखेका छन्। भेलाबाट कसरी अघि बढ्ने भन्नेबारे निर्णय लिइने जोशीका छोरा दीपकराज जोशी बताउँछन्। जोशीमाथि कांग्रेसले कारबाही फुकुवा गरेको अवस्थामा उनी कसरी अघि बढ्छन् त्यसको प्रष्ट तस्बिर देखिइसकेको छैन।
कांग्रेसले तनहुँ १ मा केन्द्रीय सदस्य गोविन्द भट्टराईलाई उम्मेदवार बनाउने निर्णय गरिसकेको छ। सोमबार महामन्त्री गगन थापालगायतको उपस्थितिमा मनोनयन दर्ता गराउने कार्यक्रम तय भएको छ।
भट्टराईले पूर्वसहमहामन्त्री जोशीसँग आफूले र पार्टीका नेताहरूले पनि भेटवार्ता गरेर अघि बढ्ने प्रतिक्रिया दिए।
‘म तनहुँमा छु, हामीभन्दा सिनियर नेता गोविन्द दाइसँग भेटेर म पनि भोट माग्छु, पार्टीका नेताहरूले पनि माग्नुहुन्छ,’ उनले भने, ‘उहाँलाई हामीले पटकपटक सहयोग गरेको हो। अब उहाँले मलाई पनि सहयोग गर्नुहुन्छ भन्नेमा ढुक्क छु।’
तनहुँ १ मा नेकपा एमालेबाट पूर्वआइजिपी सर्वेन्द्र खनाल, रास्वपाबाट अर्थशास्त्री स्वर्णिम वाग्ले पनि उम्मेदवारी दिने भएका छन्। यहाँ गोविन्दराज जोशीका छोरा दीपकराज जोशी पनि उम्मेदवार हुन आकांक्षी थिए। उनले स्वतन्त्र रूपमा उम्मेदवारी नदिने तर कांग्रेस, एमालेलगायत ठूला पार्टीले सहयोग गरेमा उम्मेदवारी दिने बताएका थिए।
गत मंसिरको चुनावमा जोशीले ६ हजार ८ सय ७८ मत ल्याएका कारण उनले कसलाई सहयोग गर्छन् यसले चुनावी नतिजामा अर्थ राख्छ।
