लुम्बिनी प्रदेशका मुख्यमन्त्री डिल्लीबहादुर चौधरीलाई भेटेर राउटे समुदायले दसैं खर्च उपलब्ध गराइदिन माग गरेका छन्।
बिहीबार दाङस्थित मुख्यमन्त्री कार्यालयमा पुगेर राउटे मुखियाका प्रतिनिधि बिर्खेबहादुर शाहीको टोलीले मुख्यमन्त्री चौधरीसंग त्यस्तो माग गरेको हो।
दसै नजिक आइसकेको भन्दै बिर्खेबहादुर शाहीले मुख्यमन्त्री चौधरी र अर्थमन्त्री धनबहादुर मास्कीसँग आफ्ना जनतालाई दसैं मनाउने खर्चका लागि दुई लाख दिन आग्रह गरेका थिए।
उनले भनेका थिए, ‘अब दसैं आइसक्यो र हाम्रो जनताले दसैंमा बली पनि दिनुपर्छ। खसी पनि खानुपर्छ, हामीलाई सरकारले दुई लाख पैसा दिनुपर्छ।’
उनीहरूले दैलेखबाट खर्च माग्नका लागि दाङ आइ पुगेको बताएका थिए।
आफूहरू तीजको खर्च माग्नका लागि आएको भएपनि तीज गइसकेको हुँदा अब दसैंको खर्च जुटाउनु परेको जानकारी दिएका थिए।
बिर्खेबहादुर शाहीका अनुसार दलैखमा हाल यो समुदायको ८६ घर परिवार बसोबास गर्दै आएको छ। राउटे समुदायको कुरा सुनेपछि मुख्यमन्त्री चौधरीले केही दिन भित्रै केही सहयोग गर्ने बचन दिएका थिए।
यसअघिका वर्षहरूमा पनि राउटे समुदायका मानिसहरू दसैं खर्च माग्नका लागि प्रधानमन्त्री लगायतलाई भेट्दै आएका थिए।
-1715411980.jpg)
