सरकारले पहिलो पटक ‘प्रधानमन्त्री राष्ट्रिय प्रतिभा पुरस्कार–२०७५’ नेत्ररोग विशेषज्ञ डा. सन्दुक रुइतलाई प्रदान गरेको छ।
सरकारले राष्ट्रका निम्ति विशिष्ट योगदान पुर्याउने प्रतिभाका लागि प्रधानमन्त्री राष्ट्रिय प्रतिभा पुरस्कार र प्रधानमन्त्री राष्ट्रिय प्रतिभा अनुदान सहयोग दिने निर्णय गरी २०७५ साल मंसिर १७ गते रु दुई करोड २० लाखको कोष सुरू गर्ने निर्णय गरेको थियो।
सो पुरस्कार पहिलो पटक आज डा.रुइतलाई प्रदान गरिएको हो।
प्रधानमन्त्री तथा मन्त्रिपरिषद्को कार्यालयद्वारा आज यहाँ आयोजित समारोहमा राष्ट्रपति विद्यादेवी भण्डारीले डा रुइतलाई रु पाँच लाखको राशीसहितको सो पुरस्कार प्रदान गरेकी हुन्।
त्यसैगरी, राष्ट्रपति भण्डारीले कृषि क्षेत्रमा अत्याधुनिक प्रविधिको तथा उपकरणको आविष्कार गर्ने लमजुङ लक्ष्मीनगर निवासी रदी मियाँ र सोलार स्कुटर, ट्राफिक मास्क मादक पदार्थ सेवन गरी सवारी चलाए स्टार्ट बन्द हुने प्रविधि बनाएका तनहुँका अन्वेषक विकल्प ढुङ्गानाको योगदानको कदर गर्दै ‘प्रधानमन्त्री राष्ट्रिय प्रतिभा अनुदान सहयोग-२०७५’ स्वरूप जनही रु दुई लाख ५० हजार प्रदान गरेकी हुन्।
डा. रुइतले आफ्नो नेतृत्वमा तिलगङ्गा अस्पताल खोली तीन दशकदेखि आँखाका उपचारमा नेपालमा मात्र नभएर भारत, भुटान, चीनलगायत देशमा पनि सेवा प्रदान गर्दै आएका छन्।
उनले तिलगङ्गा अस्पतालले सुरू गरेको नयाँ प्रविधिलाई एसिया, अफ्रिका र दक्षिण अमेरिकामा पनि लैजाने निर्णय गरिएको जानकारी दिए।
‘डा रुइत नेत्र चिकित्सा क्षेत्रमा चम्किला नक्षेत्र’
राष्ट्रपति भण्डारीले डा. रुइत नेत्र चिकित्साका क्षेत्रमा चम्किला नक्षेत्र भएको बताएकी छन्।
‘नेपालको हिमाली जिल्ला ताप्लेजुङको दुर्गम क्षेत्रमा जन्मेका डा. रुइतले मानव कल्याणका क्षेत्रमा योगदान पुर्याउनुभएको छ’, राष्ट्रपति भण्डारीले भनिन्, ‘डा. रुइत नेत्र चिकित्साको क्षेत्रमा चम्किला नक्षेत्र नै हुनुहुन्छ, आगामी दिनमा उहाँले थप ख्याति प्राप्त गर्नुहुनेछ भन्ने विश्वास लिएको छु।’ रासस