मेरियम-वेब्स्टर शब्दकोशका अनुसार 'प्यान्ड्यामिक' सन् २०२० को वर्ष शब्द बनेको छ।
यो वर्ष अनलाइनमा सबैभन्दा बढी खोजी गरिएपछि 'प्यानड्यामिक' वर्ष शब्द बनेको हो।
कोरोना महामारी सुरू भएपछि यो शब्द सबैभन्दा खोजी गरिएको शब्द बनेको उसले जनाएको छ। कोरोनाका कारण हालसम्म संसारमा १४ लाख मानिसले ज्यान गुमाइसकेका छन्।
'कहिलेकाँही एउटा शब्दले एउटा युगलाई परिभाषित गर्छ र असाधारण तथा अप्ठ्यारो समयमा यो एकदमै उपयूक्त शब्द बनेर अगाडि आयो' शब्दकोशका प्रकाशकले भनेका छन्।
मेरियम-वेब्स्टर डटकमले 'प्यानड्यामिक'(महामारी) शब्दलाई 'एउटा रोगको प्रकोप जुन व्यापक भूगोलमा फैलिने गर्छ(एकभन्दा बढी देश वा महादेश) र यसले सामान्यतया जनसंख्याको एक महत्त्वपूर्ण अनुपातलाई असर गर्दछ' का रूपमा परिभाषित गरेको छ।
यसको ग्रिक मुल शब्दमा 'प्यान'को अर्थ 'सबै' र 'डेमोस'को अर्थ 'मानिसहरू' हुने सो शब्दकोशले जनाएको छ।
मार्च ११ मा विश्व स्वास्थ्य संगठनले आधिकारिक रूपमा कोभिड-१९ लाई महामारी भनेपछि यो शब्द सर्वाधिक खोजीमा परेको हो।
'सो दिन यो शब्दको खोजी १११,८०६% ले बढेको थियो, जुन एकैदिन सर्वाधिक खोजी गरिएको शब्द हो', सो शब्दकोश कम्पनीले भनेको छ।
गत वर्ष 'दे' शब्द सर्वाधिक खोजी गरिएको शब्द बनेको थियो। यो शब्दले महिला वा पुरूषका रूपमा पहिचान खुलाउन नचाहने व्यक्तिलाई बुझाउँछ।
सन् २०१८ मा 'जस्टिस' शब्द सर्वाधिक खोजी गरिएको शब्दमा परेको थियो भने सन् २०१७ मा 'फेमिनिजम' शब्द परेको थियो।
यस्तै सन् २०१६ मा भने 'सुरियल' शब्द परेको थियो।
