अख्तियार दुरूपयोग अनुसन्धान आयोगले डोल्पाको अन्नपूर्ण माध्यामिक विद्यालयका व्यवस्थापन समितिका अध्यक्ष, प्रधानाध्यापकसहित १४ जनाविरूद्ध भ्रष्टाचार मुद्दा दर्ता गरेको छ।
व्यवस्थापन समितिका अध्यक्ष जनकबुढा र प्रधानाध्यापक नरदेव रोकायासमेत १४ जनाविरूद्ध अख्तियारले आइतबार विशेष अदालतमा मुद्दा दर्ता गरेको हो।
विद्यालयको वाल निर्माणको बोलपत्र आह्वान गर्दा कम कबोल गरेकोलाई ठेक्का नदिई वडाअध्यक्षकी श्रीमतीको कम्पनीलाई दिई भ्रष्टाचार गरेको आरोपमा मुद्दा दर्ता गरेको अख्तियारको प्रवक्ता राजेन्द्रकुमार पौडेलले जानकारी दिए।
उनका अनुसार अन्नपूर्ण विद्यालय समितिका अध्यक्ष जनक बुढा, प्रधानाध्यापक नरदेव रोकाया, सहायक शिक्षक ह्रदयनारायण साह, जयबहादुर ठकुल्ला, इन्जिनियर देवराज रावत, विद्यालय व्यवस्थापक सदस्य तथा मुड्केचुला गाउँपालिका वडा-७ का वडाध्यक्ष दत्तबहादुर बुढा, व्यवस्थापक समितिका सदस्य दुर्गादेवी लामा, अशोक रोकाया, कबिता बुढा, रूपा रोकाया, पृथी ठकुल्ला, धनबहादुर कामी र नारायणी ठकुल्ला, शिक्षक तथा दर्शनको प्रोप्राइटर उषाकुमारी सिंहविरूद्ध मुद्दा दर्ता गरिएको हो।
विद्यालय मुड्केचुला गाउँपालिका वडा-७ मा छ।
बोलपत्र आह्वान गर्दा ४९ लाख ८३ हजार ३९४ कबोल गरेको महातारा निर्माण कम्पनीलाई ठेक्का नदिएर ७९ लाख ५१ हजार ७२९ रूपैयाँ कबोल गरेको दर्शन एण्ड दिग्दर्शन निर्माण सेवालाई आफूखुसी छनोट गरेको प्रवक्ता पौडेलले जानकारी दिए।
उनका अनुसार दर्शन एण्ड दिग्दर्शन निर्माण कम्पनी वडा नम्बर ७ को वडाध्यक्ष दत्तबहादुर बुढाको श्रीमती अर्थात् सोही विद्यालयको शिक्षिका उषाकुमारीको रहेको अनुसन्धानमा खुलेको छ।
उक्त निर्माण कार्यमा २९ लाख ६० हजार ६९२ रूपैया हानिनोक्सानी पुर्याएको हुँदा उनीहरूविरूद्ध सोही अनुसारको रकम विगो दावी गर्दै भ्रष्टाचार मुद्दा दर्ता गरिएको हो।
-1746009348.jpg)
