कोपा अमेरिका २०१९
फाइनल– ब्राजिल भर्सेस पेरु
समय– आज राति पौने २ बजे
कोपा अमेरिका २०१९ को उपाधिका लागि पेरुसँग भिड्नुअघि ब्राजिलियन डिफेन्डर मार्क्युनोस स-सना कुरामा ध्यानु पर्ने बताउछन्। फ्रेञ्च क्लब पेरिस सेन्ट जर्मेनका ‘राइट ब्याक’ मार्क्युनोसले पेरुप्रति निकै सजक हुनु पर्नेमा जोड दिएका छन्।
आयोजक ब्राजिलले सन् २००७ पछि ठूला प्रतियोगिताको उपाधि जित्न सकेको छैन। सन् २०१३ को कन्फेडेरेसन कप र २०१६ को ओलम्पिक्समा स्वर्ण पदक जित्नु ब्राजिलको पछिल्ला उपलब्धि हो।
ब्राजिलले सन् २००७ को कोपा जित्ने क्रममा अर्जेन्टिनालाई ३-० ले हराएको थियो। त्यसअघि सन् २००४ पनि ब्राजिलले अर्जेन्टिनालाई नै सिकार बनाएर ट्रफी उचालेको थियो।
ब्राजिलले आफूले आयोजना गरेका सबै कोपाको उपाधि जितेको छ। त्यसैले ब्राजिल १२ वर्षपछि अर्को उपाधि जित्न चाहान्छ।
‘फुटबलमा सानो कुराले धेरै असर गर्छ,’ मार्क्युनोस भन्छन्, ‘पेरु अहिले फरक अवस्थामा छ। उनीहरुलाई पराजित गर्न हामी सबैले धेरै मिहिनेत गर्नु पर्छ। किनभने फाइनल अरु खेल भन्दा फरक र कठिन खेल हो। ’
उनले फाइनलमा भावना, क्षमता र खेल कौशल देखाउनु पर्ने बताए। तीन कुरालाई सुक्ष्म विश्लेषण गरेर खेले मात्र खेल जितिने उनको भनाइ छ।
ब्राजिलको टिममा नेइमार घाइते भएर उपलब्ध नभए पनि उसले उत्कृष्ट खेलिरहेको छ। ब्राजिलले अहिलेसम्म १० गोल गरेको छ भने एक गोल पनि गोल खाएको छैन।
ब्राजिलले समूह चरणमा पेरुमाथि ५-० को जित निकालेको थियो। अर्कोतर्फ उसलाई घरेलु मैदानको फाइदा छ। त्यसलै ब्राजिलले यसपटक कोपाको नवौं उपाधि जित्ने विश्वास गरिएको छ।
फाइनलपछि प्रशिक्षक टिटेले राष्ट्रिय टिमबाट विदा लिने बताइएको छ। तर ब्राजिल फुटबल महासंघले उनले नै टिम सम्हाल्ने बताइरहेको छ।
ब्राजिल तथा स्पेनिस क्लब रियल म्याड्रिडका मिडफिल्डर कासेमिरोले राष्ट्रिय टिमका लागि टिटे अझै जरुरत रहेको बताएका छन्।
पेरु ४४ वर्षपछि कोपा अमेरिकाको फाइनलमा पुगेको हो। सन् १९७५ मा उपाधि जितेपछि पेरुले फाइनलमा स्थान बनाउन सकेको थिएन।
समूह चरणमा तेस्रो बनेर अन्तिम आठमा पुगेको पेरुका प्रशिक्षक रिकार्डो गारेकाले फाइनलमा आश्चर्यजनक नतिजा निकाल्ने विश्वास गरेका छन्।
नकआउट चरणमा पेरुले गोल खाएको छैन। अन्तिम आठमा उरुग्वेलाई पेनाल्टी सुटआउटमा हराएको पेरुले सेमिफाइनलमा साविक विजेता चिलीलाई ३-० ले पराजित गरेको थियो।
‘जब तपाइ फाइनल पुग्नु हुन्छ। उपाधि जित्ने बाहेक अर्को विकल्प हुन्न,’ रिकार्डो भन्छन्, ‘हामीसँग उपाधि जित्न सक्षम खेलाडी छन्। पेरुका लागि उपाधि जित्ने कुनै उपयुक्त समय हो भने अहिले नै हो।’
पेरुविरुद्धको फाइनलमा ब्राजिलले अर्जेन्टिनाविरुद्धको सेमिफाइनलमा उत्रेका खेलाडीलाई प्राथमिकतामा राख्नेछ। सेमिफाइनलमा ब्राजिलले चिरपरिचित प्रतिद्वन्द्वी अर्जेन्टिनलाई २-० ले हराएको थियो।
ब्राजिलका विलियन हामस्ट्रिङबाट ग्रसित छन्। फर्डिनान्डो पनि मैदान फर्कन संघर्षरत छन्। यता पेरुका जोफर्सन फर्फान पेरुविरुद्ध मैदान फिट हुनेमा शंका छ।
