कञ्चनजंघा हिमाल आरोहण गर्नका लागि ४७ आरोही आधार शिविर पुगेका छन्। यस वर्ष यतिधेरै आरोही कञ्चनजंघा आरोहण गर्न एकैपटक आधार श्वििर पुगेका हुन्।
दक्षिणी र उत्तरी पदर्माग हुँदै आरोही कञ्चनजंघा आधार शिविर पुग्ने गर्छन्। दक्षिणी पदर्माग हुँदै ३६ आरोही कञ्चनजंघा आधार शिविर पुगेको कञ्चनजंघा संरक्षण क्षेत्र व्यवस्थापन परिषद्को तापेथोक जाँचचौकीका पर्यटन सहायक कल्पना ताम्मादेनले जानकारी दिइन्। आधार शिविरमा भारतका पाँच, अमेरिकाका एक, जर्मनीका तीन, रोमानियाका दुई, अष्ट्रेलियाका तीन, नेदरल्याण्डका तीन, क्यानडाका दुई जनालगायत पुगेको उनले बताइन्।
केही आरोही गत साता नै आधार शिविर पुगेर आरोहणको तयारी थालेका छन्। यस्तै उत्तरी पदर्माग हुँदै रोमनियाका ६ र बेलायतका पाँच आरोही आधार शिविरमा पुगेको याम्फुदिन जाँचचौकीका पर्यटन सहायक सूर्यमान राईले बताए। कञ्चनजंघा आरोहणका लागि ६७ जनाले अनुमति लिएका छन्। आधार शिविर आउने क्रम जारी रहेको छ। समिरबहादुर बस्नेत नेतृत्वको नौ सदस्यीय नेपाली टोलीले पनि कञ्चनजंघा आरोहणको अनुमति लिएको पर्यटन विभागले जनाएको छ।
पर्यटन व्यवसायी उत्साही
लामो समय पर्यटन आगमन सुनसान भएपछि व्यवसायी निरास बनेका थिए। कञ्चनजंघा आउने पर्यटकलाई लक्ष्य गरेर ठूलो लगानीमा होटल तथा पर्यटन आवास निर्माण गरिएको थियो। कोरोनाका कारण पर्यटक नआएपछि होटल तथा पर्यटन व्यवसाय ठप्प थियो। अहिले होटल तथा पर्यटक व्यवसायी हिमाल आरोहीको आगमनसँगै उत्साहित बनेका कञ्चनजंघा संरक्षण क्षेत्र व्यवस्थापन परिषद्का पर्यटन सहायक राईले बताइन्।
फक्ताङलुङ गाउँपालिका–६ घुन्साका होटल व्यवसायी पेमा शेर्पा कञ्चनजंघा क्षेत्रमा पर्यटकको चहलपहल बढ्न थालेको बताउँछन्। ‘विगत वर्षमा दुईचार जनाबाहेक आरोहण गर्न आउँदैनथे । यसवर्ष उल्लेख्य सङ्ख्यामा आरोही हिमाल आरोहण गर्न आएका छन्,’ उनले भने। रासस
