नेकपा (एमाले) को दसौं महाधिवेशनको बन्दसत्रले पदाधिकारी र केन्द्रीय सदस्य छान्ने सर्वाधिकार अध्यक्ष केपी शर्मा ओलीलाई दिए पनि उनले आफ्नै समूहमा सर्वसम्मत गर्न सकस देखिएको छ।
ओलीनिकट नेता सुवास नेम्वाङले वरिष्ठ उपाध्यक्षको दाबी नछाडेपछि ओलीले आइतबार बिहान १० बजे प्रस्तुत गर्ने भनेको सूची अहिलेसम्म तयार हुन सकेको छैन।
आइतबार बिहान ओलीलाई भेट्न थुप्रै नेता-कार्यकर्ता उनी बसेको पार्क सफारी रिसोर्टमा आइपुगेका थिए।
वरिष्ठ उपाध्यक्षमा ईश्वर पोखरेलले पनि दाबी गरेका छन्। ओलीले यसअघि नै नेम्वाङलाई पार्टीले अवसर पाए उनलाई राष्ट्रपति बनाउने आश्वासन दिएका थिए। नेम्वाङले भने ओलीको उक्त प्रस्ताव यसअघि नै अस्वीकार गरिसकेका छन्।
आइतबार बिहान नेम्वाङलाई भेट्न उनीनिकट नेताहरू पुगेका थिए। आदिवासी, जनजाति समुदायका एमाले नेता, कार्यकर्ताले नेम्वाङलाई दाबी नछाड्न भनेका थिए।
‘हामीले उहाँलाई आफ्नो दाबी नछाड्नुस् भनेका छौं। पार्टीको दोस्रो वरियतामा पुग्ने अवसरबाट हाम्रो समुदायलाई वञ्चित नगरियोस् भन्ने हाम्रो भनाइ हो,’ नेम्वाङलाई भेटन आउने एक प्रतिनिधिले भने, ‘उहाँको हकमा समावेशी भन्ने जोड्नसमेत पर्दैन, किनकी उहाँ राष्ट्रिय छवि भएको नेता हो। तर हाम्रो समुदायले गर्व गर्ने नेता पनि हो नि त।’
नेम्वाङले पनि अध्यक्ष ओलीबाहेक आफूभन्दा माथि कुनै नेता नभएको बताएका छन्। उनले अरू कसैलाई आफूमाथि राखेर सहमति नहुने सन्देश ओलीलाई दिइसकेका छन्।
‘उहाँले ओलीबाहेक मेरो अरू कुनै नेता छैन भनिसक्नुभएको छ,’ नेम्वाङनिकट स्रोतले भन्यो।
ओली र नेम्वाङ एउटै होटलमा बसेका छन्। तर उनीहरूबीच प्रत्यक्ष कुरा हुन सकेको छैन। आइतबार बिहान नेम्वाङले प्रदेश १ का पूर्वमुख्यमन्त्री शेरधन राईमार्फत् ओलीलाई आफ्नो सन्देश पठाएका छन्।
नेम्वाङले ओलीलाई अर्को व्यक्ति वरिष्ठ उपाध्यक्ष बनाउने भए आफू चुनाव लड्ने सन्देश पठाएका छन्।
