सत्तारूढ नेपाल कम्युनिष्ट पार्टी (नेकपा) का नेता तथा पूर्वप्रधानमन्त्री माधवकुमार नेपालले देश विकासका लागि सबै एकजुट हुनुपर्ने बताएका छन्।
शनिबार काठमाडौंमा आयोजित एक कार्यक्रममा नेता नेपालले विकासका लागि नागरिक, सरकार तथा संघसंस्थाहरू एकजुट हुनुपर्ने बताएका हुन्।
उनले सरकारको कामकारबाहीप्रति गुनासो पोखे। ‘नागरिक सुस्त भए भने सरकार पनि सुस्त हुन्छ,’ उनले भने, ‘कहिलेकाहीँ धेरै काम गर्ने अपेक्षा गरिएको सरकारले काम गर्न सक्दैन।’ सरकार, नागरिक र संघसंस्था तीनै पक्ष हातेमालो गरेर अघि बढे मात्रै काम हुने उनले बताए।
सरकारले विकास निर्माणका काम अनुसन्धान र तयारी विना नै गरिराखेको उनको भनाइ थियो। योजनाहरू हतारमा बन्ने गरेको उनले बताए। ‘काठमाडौंको धुलोधुँवा हटाउन स्थानीय स्तरबाट पनि काम गर्नुपर्छ,’ उनले भने, ‘साना काम पनि सरकार आउला र गर्ला भनेर कुर्न हुँदैन। नागरिकले पनि काम गर्नुपर्छ।’