निवर्तमान सभामुख कृष्णबहादुर महराबाट बलात्कृत भएको आरोप लगाएकी महिलाले आफ्ना श्रीमानसँग सल्लाह गरेर महराविरूद्ध जाहेरी दिने/नदिनेबारे निर्णय गर्ने बताएकी छिन्।
मंगलबार मुचुल्का उठाउन उनको कोठामा गएको प्रहरी टोलीलाई संसद सचिवालयमा कार्यरत ती महिलाले श्रीमान् काठमाडौंबाहिर रहेको र उनी फर्केपछि मात्रै निर्णय गर्ने बताएकी हुन्।
‘उहाँसँग कुरा भएको छ, फर्केपछि सल्लाह गरेर निर्णय गर्छु,’ उनको भनाइ उद्धृत गर्दै एक प्रहरी अधिकृतले भने।
उनका श्रीमानले पनि आफू काठमाडौंमा नरहेको र फर्केपछि श्रीमतीसँग सल्लाह गर्ने बताए।
सेतोपाटीको सम्पर्कमा आएका उनले भने, ‘म फर्किँदैछु। घटनाबारे बल्ल थाहा पाएँ। तर, के भएको रहेछ श्रीमतीसँग कुरा गरेर बुझ्छु। अनि हामी निर्णय गर्छौं।’
मंगलबार मध्याह्न महानगरीय प्रहरी परिसर काठमाडौं, महानगरीय प्रहरी अपराध महाशाखा र बानेश्वर वृत्तका प्रहरी महिलाको पेरिसडाँडास्थित कोठामा पुगेका थिए। प्रहरीले कोठाबाट रक्सी, महराको भाँचिएको चस्मा, गिलास, कपडालगायत बरामद गरेको थियो।
बरामद भएका वस्तुको फिङ्गर प्रिन्ट परीक्षण गर्न विधिविज्ञान प्रयोगशाला पठाउने प्रहरीको तयारी छ।
आइतबार राति महरा ती महिलाको कोठामा पुगेका थिए। त्यसक्रममा उनले बलात्कार गरेको आरोप महिलाले लगाएकी छन्।
बलात्कार आरोप लागेसँगै महराले सभामुखबाट राजीनामा दिएका छन्।
यो पनि पढु्नुस्:
