भूमि, व्यवस्था सहकारी तथा गरिबी निवारण पद्मा अर्यालले सहकारी संस्थाद्वारा सञ्चालित सहकारी स्वास्थ्य अस्पतालहरूको अधिकतम परिचालन गर्न, सहकारी स्वास्थ्य संस्थाहरूबाट चलाइएका एम्बुलेन्स बिरामीको ओसारपसारमा परिचालन गर्न निर्देशन दिएकी छन्।
सहकारी अभियन्ताहरूसँग आज भएको छलफलमा मन्त्री अर्यालले स्थानीय प्रशासनसँग समन्वय गर्दै सहकारी बैंक, सहकारीहरू आंशिक रूपमा खोलेर जीविकोपार्जन, औषधोपचार जस्ता सेवाहरू प्रवाह गर्न निर्देशन दिएकी हुन्।
आफ्ना शेयर सदस्यहरूको स्वास्थ्यलाई ध्यानमा राखेर आफू पनि बचेर शेयर सदस्यहरूलाई सचेतनामूलक कार्यक्रममार्फत् सचेत गराउन मन्त्री अर्यालले सहकारी संस्थाहरूलाई आग्रह गरेकी छन्।
कोरोनाको संक्रमणका कारण मुलुक लकडाउनको अवस्थामा रहेका सन्दर्भमा निकाल्दै मन्त्री अर्यालले भनिन्, 'मुलुक अहिले संकटमा छ। यस्तो विपद्को बेलामा सहकारी क्षेत्रको सहयोग अमूल्य रहन्छन्। यो अभियान सबैतिर फैलिएको छ। त्यसैले तपाईंहरूले सेवामुखी भावनाले जनतालाई सहयोग गरी यो विपद्सँग लड्न राष्ट्रलाई सहयोग गर्नुस्।'
यसअघि आइतबार सहकारी विभागले विश्वव्यापी रूपमा फैलिएको कोभिड-१९ को संक्रमणबाट मानव जीवनको रक्षाका निम्ति सहकारी संस्थाहरूलाई ६ बुँदे परिपत्र गरिसकेको छ।
