नेकपा एमालेका अध्यक्ष एवं प्रधानमन्त्री केपी शर्मा ओलीले बिहीबार १ राज्यमन्त्री र ७ मन्त्रीसहित ८ जना थपेसँगै २५ सदस्यीय पुरा भएको छ।
एमाले र राजपाका नेताहरूलाई समेटेर प्रधानमन्त्री ओलीले अठारौं पटक मन्त्रिपरिषद बिस्तार गरेका हुन्।
गृहमन्त्रीमा एमालेका खगराज अधिकारी, सञ्चार मन्त्रीमा नैनकला थापा, कृषि मन्त्रीमा ज्वालाकुमारी साह, वनमन्त्रीमा नारदमुनि राना, विना विभागीय मन्त्रीमा मोहन बानियाँ, उद्योग मन्त्रीमा राजपाका राजकिशोर यादव, सामान्य प्रशासन मन्त्रीमा गणेश पहाडी र वन राज्यमन्त्रीमा आशाकुमारी विकलाई ओलीले आज मन्त्री बनाएका हुन्।
प्रधानमन्त्री ओलीले नैनकला थापा सञ्चार तथा सूचना प्रविधि मन्त्री नियुक्त गरेका छन्। उनी पूर्वगृहमन्त्री रामबहादुर थापा 'बादल' की श्रीमती हुन्। सर्वोच्च अदालतले जेठ ६ गते दिएको आदेशअनुसार सांसद नरहेका बादलको पद खारेज भएको थियो।
माओवादी छाडेर आफूतिर आएका बादललाई पुरस्कारस्वरूप प्रधानमन्त्री ओलीले बादलकी श्रीमती नैनकलालाई मन्त्री बनाएका हुन्।
सञ्चारमन्त्री बनेकी थापा पछिल्लो समय सक्रिय राजनीतिमा थिइनन्। २०६३ सालमा माओवादी शान्ति प्रक्रियामा आएपछिका १५ वर्षसम्म उनी कहिल्यै सांसद भएकी थिइनन्।
यस्तै प्रधानमन्त्रीले कास्कीका एमाले नेता खगराज अधिकारी गृहमन्त्री बनाएका छन्।
आज गृहमन्त्रीको सपथ लिन लागेका अधिकारी यसअघि सुशील कोइराला प्रधानमन्त्री हुँदा स्वास्थ्य तथा जनसंख्या मन्त्री थिए।
२०६४ सालको संविधान सभा चुनावमा पराजित भएका अधिकारीले २०७० मा टिकट नै पाएका थिएनन्। लामो समय आफ्नो समूहमा रहेका अधिकारीलाई ओलीले नै कोइराला मन्त्रिपरिषदमा पठाएका हुन्।
२०७४ मा कास्कीबाट चुनाव जितेलगत्तै उनी एमाले प्रमुख सचेतक बनेका थिए। नेकपा एकता भएपछि उनी हटेर देव गुरूङ प्रमुख सचेतक भएका हुन्।
ओलीको २५ सदस्यीय मन्त्रीमण्डलमा अधिकांश प्रदेश नम्बर २ का छन्। अर्थात १४ जना प्रदेश नम्बर २ बाट बनाएका छन्। जुन ५६ प्रतिशत हो।
यसअघि गत जेठ २१ गते प्रधानमन्त्री ओलीले राजपाका एक उपप्रधानसहित १० मन्त्रीहरूसमेटेर मन्त्रिमण्डल पुनर्गठन गरेका थिए। त्यसबेला जसपाबाट राजेन्द्र महतो उपप्रधान तथा सहरी विकास मन्त्री भएका थिए भने शरदसिंह भण्डारी ऊर्जा मन्त्री भएका थिए।
अनिलकुमार झा खानेपानी मन्त्री, लक्ष्मणलाल कर्ण भूमि सुधार, एकवाल मियाँ खेलकुद मन्त्री, विमल श्रीवास्तव श्रममन्त्री, उमाशंकर अरगरिया, पर्यटन मन्त्री, चन्दा चौधरी महिला तथा बालबालिका मन्त्री, रेनुका गुरूङ महिला राज्यमन्त्री र चन्द्रकान्त चौधरी ऊर्जा राज्यमन्त्री बनाएका थिए।
साथै ओलीले जेठ २१ मै एमालेबाट बिष्णु पौडेल र रघुवीर महासेठलाई उपप्रधानमन्त्री बनाएका थिए। पौडेल अर्थमन्त्री र महासेठ परराष्ट्र मन्त्री पनि छन्। शेरबहादुर तामाङ स्वास्थ्य मन्त्री बनाएका थिए। उपप्रधानमन्त्री महासेठ र कानुन मन्त्री रहेका लीलानाथ श्रेष्ठ पनि प्रदेश नम्बर २ कै हुन्।
यस्तो बन्यो २५ सदस्यीय ओली मन्त्रिपरिषद
क्र.सं. | नाम, थर | पदनाम | कार्यविभाजन |
१ | केपी शर्मा ओली | प्रधानमन्त्री | रक्षा |
२ | विष्णुप्रसाद पौडेल | उपप्रधानमन्त्री | अर्थ |
३ | रघुबीर महासेठ | उपप्रधानमन्त्री | परराष्ट्र |
४ | राजेन्द्र महतो | उपप्रधानमन्त्री | शहरी विकास |
५ | खगराज अधिकारी | मन्त्री | गृह |
६ | शरतसिंह भण्डारी | मन्त्री | ऊर्जा, जलस्रोत तथा सिंचाई |
७ | कृष्णगोपाल श्रेष्ठ | मन्त्री | शिक्षा, विज्ञान तथा प्रविधि |
८ | अनिलकुमार झा | मन्त्री | खानेपानी |
९ | शेरबहादुर तामाङ | मन्त्री | स्वास्थ्य तथा जनसङ्ख्या |
१० | राजकिशोर यादव | मन्त्री | उद्योग, बाणिज्य तथा आपूर्ति |
११ | लक्ष्मणलाल कर्ण | मन्त्री | भूमि व्यवस्था, सहकारी तथा गरिबी निवारण |
१२ | बसन्तकुमार नेम्वाङ | मन्त्री | भौतिक पूर्वाधार तथा यातायात |
१३ | लिलानाथ श्रेष्ठ | मन्त्री | कानून, न्याय तथा संसदीय मामिला |
१४ | नैनकला थापा | मन्त्री | सञ्चार तथा सूचना प्रविधि |
१५ | ज्वालाकुमारी साह | मन्त्री | कृषि तथा पशुपन्छी विकास |
१६ | बिमलप्रसाद वास्तव | मन्त्री | श्रम, रोजगार तथा सामाजिक सुरक्षा |
१७ | उमाशंकर अरगरिया | मन्त्री | संस्कृति, पर्यटन तथा नागरिक उड्डयन |
१८ | चन्दा चौधरी | मन्त्री | महिला, बालबालिका तथा ज्येष्ठ नागरिक |
१९ | एकवाल मियाँ | मन्त्री | युवा तथा खेलकुद |
२० | नारद मुनि राना | मन्त्री | वन तथा वातावरण |
२१ | गणेशकुमार पहाडी | मन्त्री | सङ्घीय मामिला तथा सामान्य प्रशासन |
२२ | मोहन बानिया | मन्त्री | प्रधानमन्त्री तथा मन्त्रिपरिषद्को कार्यालय |
२३ | चन्द्रकान्त चौधरी | राज्यमन्त्री | ऊर्जा, जलस्रोत तथा सिंचाई |
२४ | रेणुका गुरूङ | राज्यमन्त्री | महिला, बालबालिका तथा ज्येष्ठ नागरिक |
२५ | आशाकुमारी वि.क. | राज्यमन्त्री | वन तथा वातावरण |