पूर्वमन्त्री एवं रौतहट क्षेत्र नम्बर ३ बाट प्रतिनिधि सभा चुनावका लागि उम्मेदवारी दर्ता गरेका प्रभु साहले आफू नेकपा एमालेमा नरहेको बताएका छन्।
सेतोपाटीसँग आज कुराकानी गर्दै साहले आफूले स्वतन्त्र उम्मेदवारी दिएसँगै एमालेमा नरहेको बताए। एमालेसँग अब मित्रवत सम्बन्ध मात्रै रहने उनको भनाइ छ।
साहले चुनावसम्म आफू स्वतन्त्र नै बस्ने बताए। मंसिर ४ मा चुनाव हुँदैछ। साहले नेकपा एमालेबाट टिकट पाए पनि स्वतन्त्र रूपमा उम्मेदवारी दर्ता गराएका थिए।
‘म चुनावसम्म स्वतन्त्र नै रहन्छु। राजनीतिक दलबारे अहिले मैले केही सोचेको छैन,’ उनले भने, ‘चुनावपछि मात्रै यसबारे निर्णय हुन्छ।’ उनले नेकपा एमालेबाट आफूमाथि धोका भएको पनि बताए।
‘एमालेबाट मलाई धोका भयो। पार्टी अध्यक्ष केपी शर्मा ओलीले मसँग रहेका साथीहरूलाई टिकट दिनुभएन,’ उनले भने। एमालेले जसपासँग चुनावी गठबन्धन गरेर अनैतिक काम गरेको उनले आरोप लगाए।
एमालेले जसपासँग तालमेल गरेकोले आफूले स्वतन्त्र उम्मेदवारी दिएको उनले बताए। साह एमाले स्थायी कमिटी सदस्यको भूमिकामा थिए।
साहले स्वतन्त्र रूपमा उम्मेदवारी दिएपछि एमाले अध्यक्ष ओलीले भने उक्त कदमलाई राजनीतिक बेइमानी भनेका छन्।
प्राइम टेलिभिजनमा पत्रकार ऋषि धमलासँग कुराकानी गर्दै ओलीले मधेस प्रदेशमै एमालेलाई उमेदावारविहीन बनाउन साहले षड्यन्त्र गरेको आरोप लगाएका छन्।
साहले रौतहटबाट तीन पटक निर्वाचन जितेका थिए। यसपालि उनले चुनाव जित्न कठिन छ। उनले तीन पटक माओवादीबाट चुनाव जितेका थिए।
२०७७ फागुन २३ गते सर्वोच्च अदालतले एमाले-माओवादी केन्द्रलाई अलग गराइदिएपछि साह एमालेमा क्रियाशील भएका थिए।
