वैशाख १० गते हुने उपनिर्वाचनको लागि राष्ट्रिय स्वतन्त्र पार्टी (रास्वपा) ले उम्मेदवारहरूलाई टिकट दिएको छ।
शनिबार बसुन्धारास्थित पार्टी कार्यालयमा पत्रकार सम्मेलन आयोजना गरी उम्मेदवारहरूलाई टिकट दिएको हो। चितवन क्षेत्र नम्बर २, तनहुँ क्षेत्र नम्बर १ र बारा क्षेत्र नम्बर २ मा उपनिर्वाचन हुँदैछ।
सर्वोच्च अदालतले सभापति रवि लामिछानेको सांसद पद खारेज गरेपछि चितवन-२ मा उपनिर्वाचन हुन लागेको हो। उनले नागरिकता पुन:प्राप्ति गरिसकेका छन्।
तनहुँबाट निर्वाचित रामचन्द्र पौडेल राष्ट्रपति र बाराबाट निर्वाचित रामसहाय प्रसाद यादव उपराष्ट्रपति भएपछि ती क्षेत्रमा पनि उपनिर्वाचन हुन लागेको हो।
उपनिर्वाचन हुन लागेका तीन वटै क्षेत्रमा रास्वपाले उम्मेदवार उठाउन लागेको हो। गठबन्धन नगरीकन नै यी क्षेत्रमा निर्वाचन लड्न रास्वपाले घोषणा समेत गरेको छ।
चितवन-२ मा सभापति रवि लामिछाने, तनहुँ-१ मा स्वर्णिम वाग्ले र बारा-२ मा रमेश खरेलले रास्वपाबाट टिकट पाएका हुन्। नेपाली कांग्रेसमा रहेका वाग्लेले शुक्रबार नै पार्टी छोडेको घोषणा गरेका थिए। यस्तै नेपाल सुशासन पार्टीका खरेलले पनि रास्वपासँग पार्टी एकीकरण गर्ने विषयमा छलफल भइरहेको बताएका हुन्।
उम्मेदवार बन्न लागेका तीनै जनालाई आयोजित कार्यक्रममा पार्टीका केन्द्रीय निर्वाचन आयोगका प्रमुख नारायणप्रसाद प्याकुरेलले उम्मेदवारको टिकट दिएका थिए।
सभापति लामिछानेले तीनै जना उम्मेदवार उपनिर्वाचनबाट निर्वाचित हुने बताए।
‘निर्वाचित भएर हामी तीन भाइसँगै सांसदका रूपमा उभिनेछौं,’ उनले भने।
यस्तै उनले आफ्नो पार्टी देशकै सबभन्दा ठूलो र सबभन्दा लोकतान्त्रिक पार्टी भएर चाँडै खडा हुने पनि बताए।
उनले देशमा रहेका विज्ञहरूले मुलुकलाई सेवा गर्न, आफ्नो विज्ञता प्रस्तुत गर्ने ठाउँ बनाएको पनि बताए। कतिपय विज्ञहरू भएर पनि काम गर्ने देखाउने ठाउँ नभएकाहरूका लागि पनि यो पार्टी बनाएको उनले बताए।
यस्ता थुप्रै क्षमतावान व्यक्तित्वहरू यस पार्टीको माध्यमबाट मुलुकको सेवा गर्न भनेर बसेको पनि उनले बताए।
‘म कहाँ गएर मेरो विज्ञता प्रस्तुत गरौं, कहाँ गएर यो मुलुकको सेवा गरौं भनेर सोचिरहनुभएका सबैका लागि हामीले ठाउँ राखेका छौं। र म यहाँहरूलाई संकेत मात्रै गर्न चाहन्छु कि कयौं यस्ता क्षमतावान व्यक्तित्वहरू यस पार्टीको माध्यमबाट मुलुकको सेवा गर्न तयार बस्नुभएको छ,’ उनले भने, ‘निर्वाचनसँगै तपाईंहरूले प्राप्त गर्नुहुनेछ। र यो संकेत हो। कि राष्ट्र स्वतन्त्र पार्टी यो देशको सबभन्दा ठूलो र देशको सबभन्दा लोकतान्त्रिक पार्टी भएर चाँडै नै खडा हुन्छ।’
स्वर्णिम वाग्ले, रमेश खरेल जस्ता व्यक्तित्वको पार्टीमा प्रवेश जनाउ घण्टीमात्रै रहेको पनि उनले बताए। यस्ता थुप्रै व्यक्तित्वहरू जोडिन लागेको भन्दै उनले संकेत पनि गरेका छन्।
‘यो जनाउ घण्टी मात्रै हो। डा. स्वर्णिम वाग्ले, रमेश खरेलसँगैको यो प्रेस भेटघाट कार्यक्रममार्फत् आम नागरिकलाई जानकारी दिने आजको यो कार्यक्रम त्यो आउँदै गरेको हजारौं क्षमतावान मानिसहरू जोडिन आँटेको कुराको जनाउ घण्टी मात्रै हो। सम्पूर्ण होइन,’ उनले भने।
स्वर्णिम वाग्ले र रमेश खरेल जस्ता क्षमतावान व्यक्तिहरूलाई पनि हराउन नहुने पनि उनले बताए।
यस क्षेत्रमा उनीसँग नेपाली कांग्रेसका पूर्व चितवन जिल्ला सभापति जितनारायण श्रेष्ठ र नेकपा एमालेका रामप्रसाद न्यौपानेलाई उम्मेदवार बनाएको छ।
यस्तै तनहुँ क्षेत्र नम्बर १ मा उपनिर्वाचन लागेका वाग्लेले आफू छोटो अवधिमा द्रुत गतिमा नेपाल बनाउने महाअभियानमा लागेको बताएका हुन्।
‘आजैदेखि नयाँ महाअभियान, नेपाल बनाउने महाअभियान, छोटो अवधिमा द्रुत गतिमा नेपाल बनाउने महाअभियानमा हामी होमियौं। त्यो घोषणा म यहाँबाट गर्न चाहेँ,’ उनले भने।
यस्तै नयाँ राजनीतिक युग सुरू गर्ने संकल्प लिएर आएको पनि उनले बताएका छन्।
‘छोटो समयमा नेपाललाई बत्ताएर सम्मान योग्य मिडल इनकम राष्ट्र बनाउने, दीगो विकासका लक्ष्यहरूलाई परिपूर्ति गर्ने, आइरहेका विभिन्न जटिलताहरू भूराजनीति, जलवायुसँग सम्बन्धी, अनियमित संरचनात्मक रूपान्तरणका कुराहरू छन्,’ उनले भने, ‘नयाँनयाँ प्रविधिका धक्काहरू, टेक्नोलोजीका थ्रस्टका कुराहरू, यी सबैलाई व्यवस्थापन गरेर परिपक्व राजनीतिक अभ्यास, विज्ञहरूको सरसल्लाहमा जनताबाट अनुमोदित भएर एउटा नयाँ राजनीतिक युग हामी सुरू भन्ने संकल्पसहित म यहाँ उपस्थित भएको छु।’
उनले नेपाली कांग्रेस नछाडेर धैर्य गर्नुपर्थ्यो भनेर कतिपयले टिप्पणी पनि गरेका छन्। मंसिर ४ मा भएको निर्वाचनका लागि उनले नेपाली कांग्रेसका लागि घोषणा पत्र समेत लेखेका थिए।
तर अब आफ्नो लक्ष्य छोटो अवधिमा देश बनाउने भएकाले पनि रास्वपामा आएको उनले बताए।
‘धैर्य गर्नुपर्थ्यो, कुर्नुपर्थ्यो, निगाहका कुराहरू आएका छन्, कृपाका कुराहरू आएका छन्, तर मैले के भनेको छु भने समयसीमा नै तोकेर डेलिभरीको राजनीतिमा हामीले नेपालको पोलिटीलाई कोल्टे फेराउनुपर्छ भन्ने लाग्छ,’ उनले भने।
उनले आफू फेरि नेपाली कांग्रेसमा नफर्किने पनि बताएका छन्। पछाडि फर्किने बानी नरहेको भन्दै उनले कांग्रेस नफर्किने बताए।
‘म रास्वपाको साधारण सदस्यको रूपमा यहाँ उपस्थित छु। पछाडि फर्कने मेरो बानी छैन, अगाडि नै जाने मक्सद लिएर म आएको हुँ,’ उनले भने।
यस्तै पार्टी छाडेको दिन केही महामन्त्रीद्वय गगन थापा, विश्वप्रकाश शर्मा लगायतलाई पठाएको निजी सन्देशबारे पनि उनले प्रष्ट्याएका छन्।
उनले लोकतान्त्रिक पार्टीहरूबीच पछि कुनै समय गठबन्धन, सहकार्य गर्न सकिने तर कांग्रेसमा फर्किन्छु भन्ने उल्लेख नगरेको पनि बताए।
‘सार्थक अथवा निर्णायक तपाईंहरू जस्ता सुधारक भनेर चिनिएका पात्रहरूले नेपाली कांग्रेस पार्टीमा आउनुभयो भने त्यतिबेला रास्वपा पनि लोकतान्त्रिक पार्टी हो, विश्वसनीय वैकल्पिक लोतान्त्रिक पार्टी हो,’ उनले भने, ‘उहाँहरू पनि पूरानो लोकतान्त्रिक पार्टी हो। सहकार्य गर्न सकिने, हामी गठबन्धनको संस्कारमा छौं। मिलेर जान सकिन्छ भन्ने हिसाबले भनेको हुँ। जसरी कम्युनिष्ट पार्टीहरूले पनि गठबन्धन गरे। तर म फेरि नेपाली कांग्रेस फर्किने कुरा उल्लेख गरेको हैन।’
यस क्षेत्रमा नेपाली कांग्रेसले केन्द्रीय सदस्य गोविन्द भट्टराईलाई र नेकपा एमालेले पूर्व आइजिपी सर्वेन्द्र खनाललाई उम्मेदवार बनाउने निर्णय गरेको छ। खनालले पनि गत मंसिर ४ गते काठमाडौं-५ बाट निर्वाचन लडेका थिए। तर उनी रास्वपाका शिशिर खनालसँग पराजित भएका थिए।
त्यसैगरी बारा क्षेत्र नम्बर २ मा उपनिर्वाचन लड्न लागेका पूर्वडिआइजी रमेश खरेलले पत्रकार सम्मेलनमा आफू उपनिर्वाचन लड्नुका आधारहरू बताएका हुन्।
आफूले २९ वर्ष देशको सेवा गर्नु नै पहिलो आधार भएको उनले बताए। नेपाल प्रहरीमा रहँदा गरेको सेवाबारे बताएका उनले बताएका हुन्।
‘७७ वटै जिल्ला, १६५ वटै निर्वाचन क्षेत्रमा रमेश खरेल उठ्ने आधारहरू छन्। स्वर्णिम वाग्ले पनि उठ्ने आधारहरू छन्,’ उनले भने, ‘म टेस्टेड मान्छे हुँ। म मौका पाएर इमानदार भएर निस्केको मान्छे हुँ भन्दा घमण्डी नभन्नुहोला। यो मेरो आधार हो।’
नेपाली जनता इमानदार मान्छेको खोजीमा रहेको पनि उनले बताए।
नेपाल सुशासन पार्टी एकीकरण पनि हुनसक्ने र यसबारे छलफल भइरहेको उनले बताए।
खरेलले मंसिर ४ गते भएको निर्वाचनमा काठमाडौं क्षेत्र नम्बर १ बाट उम्मेदवारी दिएका थिए। तर त्यहाँ नेपाली कांग्रेसका प्रकाशमान सिंह निर्वाचित भएका थिए।
राष्ट्रिय स्वतन्त्र पार्टीको तर्फबाट पुकार बम उम्मेदवार थिए। यस क्षेत्रमा निर्वाचन हारेपछि पुन: उपनिर्वाचनमा बाराबाट चुनाव लड्न जानुका आधार के हुन् भनेर पत्रकारले प्रश्न गरेका थिए।
खरेलसँगै बारा-२ मा जनता समाजवादी पार्टीका अध्यक्ष उपेन्द्र यादवले पनि उम्मेदवारी दिने तयारी गरेका छन्। सत्ता गठबन्धनको तर्फबाट उनी नै साझा उम्मेदवार बन्ने पक्कापक्की छ। यता नेकपा एमालेले पनि त्यहाँ कसलाई उम्मेदवार उठाउने भन्ने निर्णय गरिसकेको छैन।