काठमाडौंस्थित भारतीय दूतावासले म्याग्दीमा दुई वटा एम्बुलेन्स सहयोग प्रदान गरेको छ।
भारतको ६९अौं गणतन्त्र दिवसको अवसरमा अन्नपूर्ण गाउँपालिका र नेपाल रेडक्रस सोसाइटी जिल्ला शाखा म्याग्दीलाई दूतावासले एम्बुलेन्स उपलब्ध गराएको हो।
अन्नपूर्ण गाउँपालिकाका अध्यक्ष डमबहादुर पुन र रेडक्रसका शाखा सभापति लेखबहादुर हमाललाई दूतावासमा आयोजित कार्यक्रममा एम्बुलेन्स हस्तान्तरण गरिएको थियो।
दुई वटामध्ये एउटा अन्नपूर्ण गाउँपालिकाले उत्तरी क्षेत्र तथा अर्को रेडक्रसले बेनी आसपास र पश्चिमी क्षेत्रमा सेवा दिने गरी सञ्चालन गर्ने जनाइएको छ। भारतीय सेनाका सेवा निवृत्त क्याप्टेन रहनुभएका गाउँपालिका अध्यक्ष पुनले एम्बुलेन्सका लागि दूतावासमा पहल गरेका थिए।
ग्रामीण क्षेत्रका सर्वसाधारण एम्बुलेन्स सुविधाको अभावमा समयमै अस्पताल पुग्न नपाउने र महँगो खर्च गर्नुपर्ने समस्या रहेकाले उनीहरुलाई राहत पुगोस् भनेर एम्बुलेन्स सञ्चालन गर्न लागिएको अध्यक्ष पुनले बताए।
अन्नपूर्ण गाउँपालिकामा रहेका भूपू सैनिकलाई समेटेर समिति गठन गरी सोही समितिमार्फत एम्बुलेन्स सञ्चालन गरेर सेवा दिने पुनले बताए। हाल म्याग्दीमा एउटा बेनी अस्पतालको मात्र एम्बुलेन्स सञ्चालनमा छ ।
मोना बेलायतले नेपाल रेडक्रश सोसाइटी भुरुङ तातोपानी उपशाखा र जिल्ला शाखालाई उपलब्ध गराएको दुई वटा एम्बुलेन्स मर्मतको अभावमा थन्किएका छन् भने दरवाङ उपशाखाको एम्बुलेन्स चालक अभावमा प्रयोगमा आउन सकेको छैन।
