निर्माण तयारीमा रहेको फिल्म 'पूर्ण बहादुरको सारंगी' मा कलाकारको लाइनअप तयार हुने क्रम जारी छ।
अन्तर्राष्ट्रिय रूपमा फिल्म वितरण गर्दै आएको कम्पनी सेभेन सिज इन्टरटेन्मेन्टले निर्माण गर्न लागेको फिल्मका लागि मुख्य भूमिकामा कलाकार प्रकाश सपूत र मुकुन भुसाल अनुबन्धित भइसकेका छन्।
यसैबीच, निर्माण टिमले थप तीन जना कलाकारहरूलाई फिल्ममा भित्र्याएको छ। कलाकारहरू देशभक्त खनाल, भोलाराज सापकोटा र विनोद न्यौपाने फिल्ममा अनुबन्धित भएका हुन्।
फिल्ममा उनीहरूलाई पनि शीर्ष भूमिकामध्येमा देख्न सकिने निर्माता विनोद पौडेलले जानकारी दिए। कलाकारहरूको भूमिकाको बारेमा भने केही खुलाइएको छैन।
सोसल–ड्रामा फिल्मलाई सरोज पौडेलले लेखन एवं निर्देशन गर्नैछन्।
जेठको दोस्रो साताबाट छायांकनमा जाने तयारीमा रहेको फिल्ममा विनोद पौडेल र प्याट्रिक सुवेदीको लगानी रहनेछ। रमेश चौलागाईं र हरि श्रेष्ठ फिल्मका कार्यकारी निर्माता हुन्। महेश दवाडीको पटकथा तथा संवाद रहने फिल्ममा प्रशान्त सिवाकोटीको संगीत रहनेछ।
फिल्मलाई आउँदो वर्ष २०८२ मा प्रदर्शनमा ल्याइने जनाइएको छ।
