अस्ट्रेलियाको सीड्नीमा राष्ट्रिय एकता दिवस तथा पृथ्वी जयन्ती धुमधामका साथ मनाइएको छ।
स्थानीय नेपाली युवा अभियन्ता डिला खरेल, दिपक पौडेल र मदनमणि अधिकारीले अर्वनपार्कमा सोमबार आयोजना गरेको पृथ्वी जयन्ती तथा एकता दिवसमा बिहानदेखि साझँसम्म पृथ्वी नारायण शाहको तस्वीरमा माल्यापर्ण गरेर राष्ट्रिय गानका साथ मनाइएको थियो।
नेपाल एकिकरणका नायक तथा नेपाली राष्ट्रीयताका प्रणेता पृथ्वी नारायण शाहको जन्म जयन्तीलाई अन्तर्राष्ट्रिय नेपाली दिवसका रुपमा केही वर्षदेखि अष्ट्रेलियामा मनाउँदै आइएको आयोजकमध्येका एक डिला खरेलले जानकारी दिए।
‘इतिहासलाई सम्मान गर्न सकेमात्र गर्विलो भविष्य बनाउन सकिने हुनाले नेपाल एकिकरण गरेर हामीलाई नेपाली बनाउने पृथ्वी नारायण शाहलाई हामीले विदेशमा बसेर पनि सम्मान गर्ने परम्पराको थालनी गरेका हौ’, खरेलले भने।
मन्तब्य र औपचारिक कार्यक्रम बिना सम्मानको फूल चढाउन आयोजना गरिएको कार्यक्रममा स्थानीय अर्वन नेपाली अभिभावक समाजले दिनभरनै राष्ट्रिय गान बजाएर माहौललाई निकै मनमोहक बनाएका थिए।
स्थानीय नेपाली अभिभावकले नेपाली बाजा मादल, हार्मोनियमसहित उपस्थित भएर राष्ट्रियता झल्कने विविध गीत संगीत पस्केका थिए।
‘पृथ्वी जयन्तीलाई यस वर्ष पनि गौरव, श्रद्धा र नेपाली एकताको त्रिवेणी बनाउने प्रयासका साथ दिनभर अन्तर्राष्ट्रिय एकता दिवस मनाउने प्रयास गरेका हौं, जुन सफल भएको छ’, आयोजक मदनमणि अधिकारीले सुनाए।
कार्यक्रममा एनआरएनका पदाधिकारी, नेपाली समाजका अगुवालगायत सयौं व्यक्तिको उपस्थिति थियो।
तोड्नेको बिगबिगी भइरहेको बेला खण्ड खण्ड राज्यलाई जोडेर अखण्ड नेपाल बनाउने राष्ट्रिय एकिकरणका नायकप्रति श्रद्धासुमन अपर्ण गर्नु महत्वको विषय भएको पुराना सञ्चारकर्मी डिल्ली ढकालले बताए।
बिहानै पृथ्वीनारायण शाहको तस्वीरमा फूलगुच्छा चढाएपछि ढकालले भने, ‘इतिहास थिएन भने वर्तमानको कल्पना पनि गर्न सकिदैनथ्यो, त्यसैले पनि विगतलाई सम्मान गर्न सक्नुपर्छ।’
करिब साढे दुई घन्टाको ट्रेन यात्रापछि ओलंघनबाट सीड्नीमा पृथ्वी जयन्ती मनाउन आएका डा.रामकृष्ण निरौलाले गर्विलो इतिहास बोकेको हाम्रो देश र त्यसमाथि पनि नेपाल राज्य निमार्ण गर्ने श्री ५ पृथ्वी नारायण शाह सम्मानको हकदार भएकोमा कुनै दुईमत नरहेको बताए।
नेपाली हामी रहन्थ्यौं कहाँ नेपालनै नरहे भन्ने गीत सम्झदै डा. निरौलाले भने, ‘जसले आज हामीलाई संसारमा चिनाएका छ उसलाई संसारको जुनै कुनामा भए पनि सम्मान गर्नुपर्छ भनेर आफू टाढैबाट भए पनि कार्यक्रममा सहभागी जनाएको हो।’
कार्यक्रममा सहभागि एनआरएनका उपाध्यक्ष देव गुरूङ, नेपाली समाजका अगुवा दिनेश जोशी, युवा अभियन्ता अजय राजवंशी, सरोज पाण्डे, विजय पौडेल, रोशन खतिवडा, राजु गिरीलगायतको उपस्थिति थियो।
यसैबिच अष्ट्रेलीयाको राजधानी क्यानबेरामा पनि राष्ट्रिय एकता दिवस र २९९ औं पृथ्वी जयन्ती भव्य रूपमा मनाईएकाे छ।
