बलिउड अभिनेता आमिर खान गतवर्ष फिल्म 'लाल सिंह चड्ढा' मा देखिएका थिए। यो फिल्म बक्स अफिसमा फ्लप भएपछि उनी कुन फिल्ममा देखिन्छन् भनेर कौतुहलता छ।
उनी हालै पञ्जाबी फिल्म 'क्यारी अन जट्टा ३' को ट्रेलर सार्वजनिक कार्यक्रममा पुगेका थिए। उक्त कार्यक्रमा उनले आफ्नो आगामी योजना बारे कुराकानी गरेका छन्।
कार्यक्रमा उनलाई कुन फिल्ममा देखिँदै हुनुहुन्छ भनेर प्रश्न गरिएको थियो। उक्त प्रश्नको जवाफ दिदै उनले भने, ‘अहिले हामी क्यारी अन जट्टा ३ को बारेमा कुराकानी गरौं। मेरो आगामी फिल्मबारे तपाईहरूलाई कौतुहलता होला तर अहिले मैले कुनै फिल्म साइन गरेको छैन। अहिले म परिवारसँग समय बिताउन चाहन्छु। म केही समय लिएर मात्रै नयाँ फिल्ममा काम गर्छु।'
कार्यक्रममा उनी लामो दारी र लामो कपालमा देखिएका थिए। कुनै फिल्मको लागि नयाँ लुक्स तयार गरेको हो भन्ने प्रश्नमा उनी भन्छन्, 'यो कुनै लुक्स होइन। अहिले मैले दारी र कपाल काटेको छैन।'
अद्वैत चन्दनले निर्देशन गरेको फिल्म 'लाल सिंह चड्ढा' मा उनीसँगै करीना कपूर खानको मुख्य भूमिका छ।
यो फिल्म हलिउड फिल्म 'फरेस्ट गम्प' को आधिकारिक हिन्दी रिमेक हो। जसमा टम ह्याक्सले मुख्य भूमिका निभाएका थिए।
यसअघि आमिरको फिल्म 'ठग्स अफ हिन्दोस्तान' बक्स अफिसमा असफल भएको थियाे।
