नेपाल राष्ट्र बैंकले आगामी आर्थिक वर्षका लागि मौद्रिक नीति सार्वजनिक गर्दैछ। होटल र्याडिसनमा दिउँसो १ बजे मौद्रिक नीति सार्वजनिक गर्ने कार्यक्रम रहेको राष्ट्र बैंकले जनाएको छ।
मौद्रिक नीतिमार्फत राष्ट्र बैंकले पुर्नकर्जाको आकार बढाउने भएको छ। यसअघि १० अर्ब रुपैयाँको आकार रहेको कोष चैतमै रित्तिएपछि आकार बढाइने भएको राष्ट्र बैंकनिकट स्रोतले जनाएको छ। उद्योग व्यवसायीहरुले यस्तो पुर्नकर्जा कोष १ खर्बभन्दा बढी पुर्याउनुपर्ने सुझाव दिँदै आएका छन्।
बैंकहरुले व्याजदर बढाउँदै लगेपछि उद्योग व्यवसायीहरु मारमा परेको भन्दै सहुलियत दरको यस्तो कर्जाको आकार बढाइनुपर्ने उद्योग व्यवसायीहरुको सुझावलाई राष्ट्र बैंकले केही हदसम्म सम्वोधन गर्ने तयारी गरेको छ।
त्यस्तै चुक्ता पुँजी नपुर्याउने बैंकहरुलाई गरिने कारबाहीका सम्वन्धमा समेत राष्ट्र बैंकले आज उद्घोष गर्ने भएको छ। राष्ट्र बैंकले आगामी ६ महिनाभित्र चुक्ता पुँजी पुगेको हुनुपर्नेगरी समयसीमा केही खुकुलो पार्ने भएको छ। यसै आर्थिक वर्षभित्र वाणिज्य बैंकहरुले ८ अर्ब र राष्ट्रियस्तरका विकास बैंकहरुले साढे २ अर्ब पुँजीको प्रक्रिया पुरा गरेको हुनुपर्ने यसअघिको नीतिमा समेटिइएको छ।
हाल कायम रहेको अटो लोनको सीमा बढाइने भएको छ। ६० देखि ७० प्रतिशतको बीचमा यस्तो कर्जा प्रवाह हुनेगरी मौद्रिक नीतिमा समेटिने बताइएको छ।
हाल कुल मूल्याङ्कनको ५० प्रतिशत मात्रै बैंक तथा वित्तीय संस्थाहरुले अटोलोन प्रवाह गर्न सक्ने व्यवस्था छ। यसअघिको मौद्रिक नीतिको अर्धवार्षिक समिक्षा गरी राष्ट्र बैंकले गाडी किन्नेहरुका लागि ५० प्रतिशत भुक्तानी गर्नुपर्ने र ५० प्रतिशतसम्म मात्रै बैंकहरुले कर्जा दिन सक्ने व्यवस्था गरेको थियो।
उत्पादन क्षेत्रमा राष्ट्र बैंकले केही कडाई गर्ने तयारी गरेको छ । स्रोतका अनुसार हाल तोकिएको २० प्रतिशतलाई बढाएर उत्पादन क्षेत्रमा लगानी गर्न बैंकहरुलाई बाध्य पारीने छ।
त्यस्तै आगामी साउनदेखि १० लाख रुपैयाँभन्दा बढी नगद कारोबारलाई निरुत्साहित गर्ने राष्ट्र बैंकको तयारी छ। साउनदेखि १० लाख रुपैयाँभन्दा बढी नगद बैंकबाट झिक्नलाई कडाई गरिनेछ।