मनकामना मन्दिरमा गजुर राखियो

सेतोपाटी संवाददाता

काठमाडौं, वैशाख १७

भूकम्पपछि पुनर्निर्माणको कार्य सुरू गरिएको गोरखाको मनकामना मन्दिरमा गजुर राखिएको छ।

क्षमापूजा गरी साइत हेराएर सोमबार मन्दिरमा गजुर राखिएको मन्दिर जीर्णोद्धार समितिका संयोजक नरेन्द्रबाबु श्रेष्ठले जानकारी दिए।

पुरानै मन्दिरको गजुरलाई ४० लाख खर्च गरी मर्मत गरिएको हो।

सरकार र भक्तजनको सहयोगले मन्दिर पुनर्निर्माण भइरहेको छ। मन्दिरका पूजारी इन्शान थापाका अनुसार आउँदो दशैंसम्म भक्तजनका लागि मन्दिर खुला गरिन्छ।

मन्दिर पुनर्निर्माणको काम भइरहँदा छेवैमा रहेको टहरोबाट पूजाआजा हुँदै आएको छ। मन्दिर पुनर्निर्माणमा करिब १२ करोड खर्च लाग्ने श्रेष्ठले बताए।

भक्तजनले दिएको चन्दा सहयोग करिब ८ करोड जुटेको छ भने सरकारले चार करोड सहयोग गरेको थियो।

पुरातत्व विभागका विज्ञ कर्मचारीको प्रत्यक्ष निगरानीमा पुरानै स्वरुपमा मन्दिर पुनर्निर्माण भइरहेको छ। मन्दिरको छानामा रहने तामाको पातामा सुनको जलप लगाउने कार्य भइरहेको छ भने छाना छाउने काम पनि तीव्र गतिमा भइरहेको छ।

जलप लगाउन १८ किलोग्राम सुन आवश्यक पर्ने श्रेष्ठले बताए। अहिलेसम्म छानामा १२ केजी सुन जलप लगाइएको छ।

प्रकाशित मिति: सोमबार, वैशाख १७, २०७५ ०५:४२

सिफारिस