नेपाल भ्रमणमा रहेको मेरिलेबोन क्रिकेट क्लब (एमसिसी) विरुद्धको एकदिवसीय खेलमा नेपाली राष्ट्रिय टिम भरपर्दा खेलाडीद्वय पारस खड्का र सन्दीप लामिछानेबिना मैदान उत्रिएको छ।
टस जितेर पहिले ब्याटिङ गरिरहेको एमसिसीविरुद्धको खेलमा तीव्र गतिका बलर सोमपाल कामी पनि छैनन्।
तीन जना मुख्य खेलाडी नभएको टिममा ज्ञानेन्द्र मल्लले औपचारिक रुपमा नेपालको कप्तानी सम्हालेका छन्।
निवर्तमान कप्तान पारसले आरामका लागि एमसिसीविरुद्ध नखेल्ने टिमलाई जानकारी दिएका छन्।
जससँगै पारसले एमसिसीविरुद्ध कुनै पनि आधिकारिक खेल खेल्ने छैनन्। किनभने एमसिसीविरुद्ध खेल्ने टी–२० र तीनदिवसीय टिममा पारसलाई समावेश गरिएको थिएनन्। उनलाई एकदिवसीय टिममा मात्र स्थान दिइएको थियो।
यता तीन वटै टिममा स्थान पाएका सन्दीपले टिम घोषणा गरे लगत्तै एमसिसीविरुद्ध खेल्न आनाकानी गरेका थिए।
टिम घोषणा गरेको भोलिपल्ट सन्दीपले व्यवस्थापक सुमन कार्कीलाई आफू एमसिसीविरुद्ध नखेल्ने बताएका थिए।
एमसिसीविरुद्ध नखेल्ने कारण सोधिएपछि सन्दीपले खेल्न राजी भएका थिए। तर सोमबार भइरहेको एकदिवसीय टिमको अन्तिम ११ मा सन्दीपको नाम समावेश छैन।
सन्दीप आइतबार भने कीर्तिपुरस्थित त्रिभुवन विश्वविद्यालयको मैदानमा उपस्थित थिए। त्यहि बीचमा सन्दीपविरुद्ध केहि फ्यानले पारसलाई समाजिक सञ्जालमा 'अनफलो' गरेको भन्दै नाराबाजी समेत गरेका थिए। लगत्तै सन्दीपले त्यसको प्रतिवाद गरेका थिए। उनले हात देखाउदै फ्यानहरुलाई पछि हट्न चेतावनी दिएका थिए।
एमसिसीविरुद्ध नेपालको यु–१९ टिमले खेलिरहदा सन्दीपले नेटमा अभ्यास गरेका थिए।
एमसिसीविरुद्धको प्लेइङ ११
ज्ञानेन्द्र मल्ल (कप्तान), इशान पाण्डे, पवन सर्राफ, शरद भेषवाकर, दीपेन्द्रसिंह ऐरी, मोहमद आरिफ शेख, विनोद भण्डारी, करण केसी, ललितनारायण राजवंशी, विक्रम शोव, अविनास बोहरा
एमसिसीको नेपाल भ्रमण
किर्तिपुर मैदानमा हुने खेल
कात्तिक १७ गते – नेपाल यु–१९ भर्सेस एमसिसी (५० ओभर)
कात्तिक १८ गते – नेपाल भर्सेस एमसिसी (५० ओभर)
कात्तिक २० देखि २२ सम्म – नेपाल भर्सेस एमसिसी (तीनदिवसीय– पहिलो श्रेणी)
कात्तिक २३ गते – नेपालको मिश्रित टिम भर्सेस एमसिसी (टी–१०)
पोखरा मैदानमा हुने खेल
कात्तिक २५ गते – नेपाल आमान्त्रित ११ भर्सेस एमसिसी (टी–२०)
कात्तिक २६ गते – मुख्यमन्त्री ११ भर्सेस एमसिसी (टी–२०)
नेपाली टिम
टी–२० टिम
ज्ञानेन्द्र मल्ल (कप्तान), आरिफ शेख, अमित श्रेष्ठ, अभिनास बोहरा, विनोद भण्डारी, दीपेन्द्रसिंह ऐरी, करण केसी, कुशल भुर्तेल, ललितनारायण राजवंशी, नन्दन यादव, पवन सर्राफ, सन्दीप जोरा, सन्दीप लामिछाने, सोमपाल कामी, सुशन भारी
५० ओभर टिम
ज्ञानेन्द्र मल्ल (कप्तान), आरिफ शेख, बसन्त रेग्मी, विक्रम शोव, विनोद भण्डारी, दीपेन्द्रसिंह ऐरी, इशान पाण्डे, करण केसी, ललितनारायण राजवंशी, पारस खड्का, रोहितकुमार पौडेल, सन्दीप लामिछाने, शरद भेषवाकर, सोमपाल कामी
प्रथम श्रेणीको टिम
ज्ञानेन्द्र मल्ल (कप्तान), आरिफ शेख, बसन्त रेग्मी, विनोद भण्डारी, दीपेन्द्रसिंह ऐरी, जितेन्द्र मुखिया, करण केसी, ललितनारायण राजवंशी, पवन सर्राफ, राजु रिजाल, रोहितकुमार पौडेल, सन्दीप लामिछाने, शरद भेषवाकर, सोमपाल कामी
.JPG)
