एक पटकको विश्व च्याम्पियन फ्रान्स २१औं संस्करणको रूस विश्वकपमा नकआउट चरण प्रवेशका लागि बिहिबार पेरूविरूद्ध खेल्दैछ।
यसअघिको पहिलो खेलमा अष्ट्रेलियालाई २-१ले हराउँदै विजयी सुरूवात गरेको उपाधिको बलियो दाबेदार फ्रान्सलाई दोस्रो चरण प्रवेशका लागि स्पष्ट जित आवश्यक पर्छ।
यस्तै एकाटेरीङवर्ग एरिनामा बिहिबार साँझ पेरूको मुख्य लक्ष्य पहिलो जित निकाल्दै दोस्रो चरणको सम्भावना जीवित राख्ने हो।
दुवै टोली आफ्नो लक्ष्यमा अडिक रहने छ। यस्तोमा आजको खेल रोमाञ्चक हुने अड्कल गर्न सकिन्छ।
फ्रान्स र पेरूबीचको खेलपछि सम्भवत समूह 'सी' को नकआउट चरण पुग्ने टोलीको टुंगो समेत लाग्नेछ। यद्यपी यही समूहका अष्ट्रेलिया र डेनमार्कबीचको पहिलो खेलले पनि समिकरणमा फेरबदल ल्याउन सक्छ।
समूह चरणको पहिलो खेलमा अष्ट्रेलियाबिरूद्ध क्षमता अनुसारको खेल नखेलेको आरोप लागेको फ्रान्सलाई आज सुधारिएको प्रदर्शन जरुरी छ।
फ्रान्ससँग जुनसुकै पोजिसनमा पनि खेल्ने राम्रा खेलाडीको कमी छैन। त्यसैले पहिलो खेलमा तुलनात्मक रूपमा कमजोर देखिएकोअस्ट्रेलियाविरुद्ध जितका लागि ठूलै संघर्ष गर्नुपरेको थियो। उक्त खेलमा पाएको ३ अंकले फ्रान्सलाई आत्मविश्वासी बनाएको छ। र पेरूलाई हराउँदै फ्रान्स समूह चरण पार गर्न चाहन्छ। हार र बराबरीले फ्रान्सलाई अर्को खेलको नतिजा कुर्नु पर्ने हुन्छ। किनकी यो समूहमा डेनमार्कको पनि ३ अंक छ। डेनमार्कले पहिलो खेलमा पेरुलाई नै स्तब्ध बनाएको थियो। फ्रान्सको खेल अघि डेनमार्कले अष्ट्रेलियासँग खेल्नेछ।
यद्यपि डेनमार्कविरुद्ध हारका बाबजुद सशक्त देखिएको पेरूलाई हराउनु फ्रान्सका लागि त्यति सहज भने पक्कै हुनेछैन।
पहिलो खेलमा शनिबार डेनमार्कविरुद्ध अधिकांश समय बल नियन्त्रणमा लिए पनि आत्मघाती गोलको सिकार बन्दा पेरू निराश भएको थियो । त्यसैले स्टार खेलाडीले भरिपूर्ण भए पनि पहिलो खेलमा अपेक्षित प्रदर्शनबाट चुकेका फ्रान्सेली खेलाडीका लागि पेरू सहज प्रतिद्वन्द्वी हुने छैन।
डेनमार्कसँग १–० गोलले पराजित भएको पेरूलाई प्रतियोगितामा टिकिरहन फ्रान्सविरुद्ध कम्तीमा एक अंक आवश्यक छ। त्यसैले पेरूले पनि फ्रान्सविरुद्ध जितकै लागि खेल्नेछ।
यी दुई टोलीबीच यसअघिका विश्वकपमा भने भेट भएको छैन। सन् १९८२ भएको मैत्रीपूर्ण खेलमा पेरूले फ्रान्सलाई १-० ले हराएको थियो। तर, विश्वकपमा फ्रान्स सन् १९७८ बाट दक्षिण अमेरिकी मुलुकसँग हारेको इतिहास छैन।
रूस विश्वकपको भेटले प्रतियोगितामा यी दुई टोलीको भविष्य निर्धारण गर्नेछ। डेनमार्कसँगको पहिलो खेलमा १-० को हारले पेरुलाई गाह्रो बनाएको छ। फ्रान्ससँग पराजित भएमा पेरू अन्तिम खेल नखेल्दै प्रतियोगिताबाट बाहिरिन पनि सक्नेछ । त्यसैले पेरु निकै दबाबमा खेल्नेछ।
पेरुविरुद्ध मैदान उत्रदा फ्रान्सलाई मुख्य फिनिसिङमा समस्या आउने छ । जुन पहिलो खेलमा देखिएको थियो। बल पोजिसनमा पकड जमाए पनि फ्रान्स गोल गर्नमा चुकेको थियो। आज फ्रान्सले त्यसलाई सुधार्न प्रयास गर्नेछ । गोल स्कोरिङमा सुधार गर्न नसके पेरुविरुद्ध जित निकाल्न फ्रान्सलाई हम्मे हम्मे पर्नेछ ।